A bana ake cika shekaru biyar da gabatar da shawarar bunkasa ci gaban duniya. Kuma a baya-bayan nan, shugaban kasar Slovak Peter Pellegrini, ya jinjinawa shawarar inganta ci gaban duniya, da sauran shawarwarin da shugaban kasar Sin Xi Jinping ya gabatar, yana mai bayyana su a matsayin muhimman abubuwa dake taka rawa, wajen ciyar da duniya gaba, da wanzar da zaman lafiya.
Shugaba Pellegrini, ya bayyana hakan ne yayin zantawarsa da wakiliyar kafar CMG ta kasar Sin, yana mai cewa jerin wasu manufofi da shugaba Xi, da bangaren Sin suka yayata, na da nufin sake dinke karfin sassan kasa da kasa, da ingiza tattaunawa tsakanin jagororin duniya, da mayar da hankali ga samar da ci gaba da zaman lafiya, da lalubo sabbin damarmaki da bangarorin hadin gwiwa, ta yadda za a kaucewa wani salo na manufofi, da akasari ke haifar da rarrabuwar kawuna da ingiza fito-na-fito.
Dangane da mahangar wasu kasashe membobin kungiyar tarayyar Turai ta EU, cewa bai dace a zurfafa hadin gwiwa da tsagin kasar Sin ba, shugaba Pellegrini, ya ce ko alama bai amince da wannan ra’ayi ba. A cewarsa bai kamata a yi watsi da wata fasaha don kawai ta fito daga kasar Sin ba.
Abun da ya dace shi ne a tabbatar da mizanin kariyar duk wani hadari, tare da tsara abubuwan da ake fatan cimmawa daga fasahohi yadda ya kamata. Ya ce kamata ya yi a budewa fasahohi kasuwanni, muddin sun cika ka’idojin hada-hada, ba tare da la’akari da tuhensu ba. (Saminu Alhassan)
