Kakakin ma’aikatar harkokin wajen kasar Sin, ya bayyana matukar adawar kasarsa, da munanan kalaman da aka jiwo sakataren tsaron Amurka Pete Hegseth ya yi, a dandalin tattaunawa na Shangri-La karo na 22 da ya gabata.
Kakakin ya bayyana hakan ne a jiya Asabar, yana mai cewa da gangan mista Hegseth, ya kawar da kansa daga kiraye-kirayen wanzar da zaman lafiya da samar da ci gaba na kasar shiyyar, inda ya mayar da hankali ga furta kalaman yakin cacar baka don haifar da fito na fito, ya kuma bata sunan kasar Sin ta amfani da zargi marar tushe, da kiran kasar da wai “mai hadari”.
- NDLEA Ta Cafke Masu Tura Alhazai Saudiyya Domin Safarar Hodar Iblis Zuwa Kasar
- Bam Ya Kashe Mutane 9 A Wata Tashar Motoci Da Ke Borno
Kakakin ya kara da cewa, ba wata kasa a duniya da ta cancanci a kira ta mai mulkin danniya sama da Amurka, wadda har kullum burinta shi ne gurgunta zaman lafiya, da daidaito a yankin Asiya da Fasifik. Don haka domin cimma burin babakere, da ingiza manufar tabbatar da tasiri a yankin tekun Indiya da Fasifik, Amurka ke ta jibge makamai a tekun kudancin Sin, tare da rura wutar tashin hankali, da haifar da yanayin matsi a yankin, wanda hakan ke juya alakar yankin zuwa wuri da tashin hankali ka iya barkewa, lamarin dake haifar da damuwa tsakanin al’ummunsa.
Jami’in na kasar Sin, ya kuma jaddada cewa batun yankin Taiwan lamari ni ne na cikin gidan Sin, wanda ba wata kasa dake da hurumin tsoma baki a cikinsa.
Dangane da batun tekun kudancin Sin kuwa, kakakin ya ce ba a taba samun wata matsala game da zirga-zirgar jiragen ruwa a sassan tekun ba, kuma har kullum kasar Sin na tsayawa tsayin daka tare da sauran kasashe wadanda batun ya shafa, wajen warware sabani yadda ya kamata, ta hanyar tattaunawa da gudanar da shawarwari, yayin da a hannu guda take kare ikon mulkin kai, da hakkoki da moriyarta daidai da dokoki da ka’idoji masu nasaba. (Saminu Alhassan)
