Bisa labarin da aka samu daga ma’aikatar albarkatun kasa ta kasar Sin, an samu babban sakamako yayin da Sin ta gudanar da aikin hakar ma’adanai bisa tsare-tsare na sabon zagaye. A yankin hakar ma’adanai na Maoniuping a gundumar Mianning dake lardin Sichuan, an samu ma’adanan farin karfe marasa nauyi, watau light rare earth mineral mafi yawa na biyu a duniya.
Bayan an yi bincike a yankin ma’adanan, an samu karin yawan albarkatu dangogin sinadarin Oxygen na ma’adanan farin karfen marasa nauyi har tan miliyan 9.6656, inda adadin ya haura wanda aka samu a baya da kashi 300%, kuma yawan albarkatun ma’adanan farin karfe marasa nauyi da ke jibge a karkashin kasa a yankin ya kai matsayi na biyu a duniya.
Albarkatu dangogin sinadarin Oxygen na ma’adanan farin karfen suna da matukar muhimmanci ga kere-keren masana’antun zamani da ma samar da kayayyaki masu amfani da fasahar zamani.
A sa’i daya kuma, a yankin hakar ma’adinan, an tabbatar da samun sauran ma’adanai masu yawa dake da alaka da ma’adinan farin karfen, wanda ke da matukar muhimmanci ga ci gaban sabbin masana’antu masu tasowa da ma wadanda za su zo a gaba.
Wannan nasara ta gano ma’adinan ta kara karfin Sin a bangaren samun albarkatun ma’adinan farin karfe marasa nauyi, inda hakan ke kara tabbatar da daidaito na tsarin masana’antu da na samar da kayayyaki a kasar. (Safiyah Ma)
