A martanin da ya mayar kan zargin Amurka, na cewa wai kasar Sin ta “saci” fasahohin zamani, tare da gurgunta ikon mallakar fasaha na dakin gwaje-gwajen fasahar AI na Amurka, kakakin ma’aikatar harkokin wajen kasar Sin Guo Jiakun, ya ce ikirarin na Amurka ba shi da tushe, batanci ne kawai kan Sin, game da nasarori da ci gaban da ta samu a fannin masana’antar fasahar AI, kuma Sin din na matukar adawa da hakan.Guo ya bayyana hakan ne a gun taron manema labarai na yau da kullun a yau Jumma’a.
Kazalika, dangane da hadin gwiwar Sin da sauran kasashe a fannin sararin samaniya, Guo ya ce sararin samaniya ba “fagen yaki” ba ne ga manyan kasashe. Kuma a bangarenta, Sin za ta ci gaba da aiki tare da dukkan sassa don gina “rukunin abokai” a sararin samaniya, da kuma inganta bunkasar harkokin binciken sararin samaniya ga daukacin bil’adama.
A daya bangaren kuma, game da yanayin farfadowar ra’ayin nuna karfin soja na Japan, Guo ya ce dole ne kasashen yankin, ciki har da Sin su kula sosai, tare da kare nasarorin da aka samu a yakin duniya na biyu, tare da kin amincewa ko kadan da farfadowar ra’ayin nuna karfin soja na Japan. (Safiyah Ma)
