Kusan mako guda bayan rasuwar wata uwa ‘yar Nijeriya mai ‘ya’ya uku sakamakon cutar daji a kasar Burtaniya, an sake samun wani lamari mai ban tausayi inda wani uba dan Nijeriya mai ‘ya’ya uku, wanda aka bayyana sunansa da Herbert kawai, aka same shi a mace a cikin gidansa.
Marigayin ya bar mata da ‘ya’ya uku kanana, yayin da iyalansa ke neman tallafin kudi domin gudanar da jana’izarsa da kuma mayar da gawarsa gida Nijeriya.
Rahotanni sun nuna cewa Herbert, wanda ke zaune a Thornaby, ya mutu ne a cikin barci a makon da ya gabata, lamarin da iyalansa suka bayyana a matsayin abin girgiza da radadi.
Wani mai amfani da dandalin D mai suna “The Stress Manager” ya bayyana cewa marigayin yana fuskantar matsananciyar damuwa ta zuciya da ta kudi bayan rasuwar mahaifinsa a Nijeriya kwanaki kadan kafin mutuwarsa.
Ya ce: “Herbert mutum ne mai nutsuwa kuma uba mai kula da iyalinsa. Ya rasu kwatsam a cikin barci a Thornaby.
“Kwanaki kadan kafin rasuwarsa, yana cikin jimamin rasuwar mahaifinsa a Nijeriya. Bai samu damar zuwa jana’izar ba, amma ya kashe duk abin da yake da shi domin ganin an yi masa jana’iza mai kyau. Wannan ya jefa shi cikin matsananciyar damuwa da rashin kudi.
“Sai ga abin da ba a zata ba ya faru—Herbert ya rasu a ranar da aka binne mahaifinsa.”
An kuma bayyana cewa abin ya fi muni saboda ‘ya’yansa ne suka fara gano gawarsa da safe, yayin da matarsa ba ta gida a lokacin.
A halin yanzu, matarsa na fuskantar nauyin kula da ‘ya’yansu uku tare da wahalar kudin jana’iza da mayar da gawar gida.
Tsohon shugaban ‘yan Nijeriya a Birtaniya, Benjamin Kuti, ya tabbatar da rasuwar Herbert tare da kira ga al’ummar ‘yan Nijeriya da su taimaka wa iyalansa.
An kuma kaddamar da wani shirin tara kudi domin tallafa wa iyalan, inda zuwa lokacin rubuta rahoton an tara fam £2,633 daga cikin burin £7,000.
A baya dai, an ruwaito rasuwar wata uwa ‘yar Nijeriya mai ‘ya’ya uku, Omotayo Abioye, wadda ta mutu sakamakon cutar sankarar mama tana da shekaru 40, lamarin da ya kara jefa al’umma cikin jimami.
