Sojojin Operation Fansan Yamma sun ceto mutane bakwai da aka sace a Jihar Katsina, tare da ƙwato shanun da aka sace a Jihar Sakkwato.
Rundunar Sojin Nijeriya ta ce sojojin sun ceto mutanen ne ranar Litinin, 21 ga watan Satumba, bayan samun kiran neman agaji kan harin da aka kai wa wata motar haya da ta taso daga Kaduna zuwa Katsina.
Mutanen da aka ceto ba tare da wani rauni ba sun haɗa da ɗalibai mata shida na Jami’ar Tarayya ta Dutsin-Ma da direban motar, wanda namiji ne.
Maharan sun tsere bayan isowar sojojin.
A Jihar Sakkwato kuwa, sojojin sun daƙile wani hari da wasu ’yan ta’adda suka shirya kai wa garin Asarara Kaura, ƙaramar hukumar Kebbe.
Sojojin sun yi musayar wuta da ’yan ta’addan yayin da suke ƙoƙarin tserewa da shanun da suka sato.
Bayan sojojin sun yi wa ’yan ta’addan ɓarin wuta, sun gudu cikin daji, inda suka bar shanun.
A halin yanzu sojoji na tsare da shanun, kuma za a mayar da su ga masu su bayan an tabbatar da mallakarsu.
