Shalkwatar Tsaro ta Nijeriya ta ce sojoji sun kai hare-hare 367 tare da daƙile wasu a sassa daban-daban na ƙasar a watan Satumban 2026.
Operation Enduring Peace ce ta fi kai mafi yawan hare-haren, inda ke da 147, sai Operation Fansan Yamma ta kai hare-hare 115, sannan Operation Whirl Stroke da hare-hare 55.
Daraktan Ayyukan Yaɗa Labaran Tsaro, Manjo Janar Michael Onoja, ya ce sojoji sun mayar da martani a kan hare-haren tare da daƙile maharan.
Ya ce a cikin watan, sojojin sun kashe ’yan ta’adda da masu aikata laifuka 52, tare da kama wasu 350, sannan suka ceto mutane 655 da aka yi garkuwa da su.
Haka kuma, ’yan tawaye 75 sun miƙa wuya.
Sojojin sun ƙwato makamai 52 da harsasai 2,335, tare da lalata wuraren tace man fetur ba bisa ƙa’ida ba guda takwas.
Sun kuma ƙwato lita sama da 304,822 ta man fetur da aka sace.
A cikin watanni uku na zango na uku na shekarar 2026, Onoja ya ce sojojin sun kashe ’yan ta’adda da masu aikata laifuka 554, sun kama 1,333, sannan sun ceto mutane 1,736 da aka yi garkuwa da su.
