Rundunar Sojojin Nijeriya ta ƙaddamar da farautar wasu mahara da suka kai hari kan shingen binciken ababen hawa na sojoji a Sopp, Ungwan Boka, da ke Ƙaramar Hukumar Riyom ta Jihar Filato, inda suka kashe soja ɗaya tare da kwashe makamai. Dakarun da ke ƙarƙashin rundunar Operation Enduring Peace ne ke gadin shingen a lokacin da aka kai harin.
Lamarin ya faru ne da misalin ƙarfe 8:00 na daren ranar Asabar, 31 ga Oktoba, 2026. Majiyoyin tsaro sun ce maharan sun buɗe wa sojojin wuta daga wurare daban-daban, lamarin da ya haifar da musayar wuta kafin maharan su tsere zuwa dazukan da ke kewaye da yankin.
Kakakin rundunar Operation Enduring Peace, Kyaftin Chinonso Polycarp Oteh, ya tabbatar da faruwar lamarin a Jos ranar Lahadi, inda ya bayyana harin a matsayin wanda aka shirya da gangan kuma ba tare da wani dalili ba. Ya ce sojojin sun dawo da zaman lafiya a yankin, kuma sun fara bin sawun maharan domin cafke su da kuma ƙwato makaman da suka kwashe.
Oteh ya ƙara da cewa jami’an tsaro sun ƙara sanya ido a yankin domin hana sake samun irin wannan hari da kuma tabbatar da tsaron mazauna garin. Ya kuma yi kira ga jama’a da su kwantar da hankalinsu, su ci gaba da harkokinsu na yau da kullum, tare da kai wa jami’an tsaro sahihan bayanai da za su taimaka wajen gano maharan.
A nasu ɓangaren, wasu mazauna yankin sun yi Allah-wadai da harin, inda suka buƙaci hukumomin tsaro su kamo waɗanda suka aikata shi. Sun bayyana damuwarsu kan kashe sojan, tare da cewa shingen binciken na taimakawa wajen daƙile ayyukan masu aikata laifuka a yankin.
