Iyaye da sauran jagororin al’umma sun kasance masu nuna damuwa sosai da yanayin karuwar hadurran da ake fuskanta dangane da amfani da fasahohin zamani, saboda mummunan tasirin da suke yi ga tushen rayuwa, kana a sa’i daya kuma, kusan dukkan al’ummomi suna fargabar irin halin da za a shiga matukar ba a sanya ka’idoji na hana amfani da fasahohin ta hanyar da ba ta dace ba.
Lura da ire-iren wadannan abubuwa masu cin tuwo a kwarya da kuma yadda ake samun saurin karuwar barazanar rashin daidaita hanyoyin amfani da fasahohin zamani, a kwanan nan, sassan kasa da kasa sun amince da kafuwar kungiyar hadin gwiwa kan fasahar kirkirarriyar basira (AI) ta duniya mai lakabin WAICO a takaice, wacce za ta yi kokarin samar da sahihin kawance na bunkasa fasahar ta AI mai amfanarwa da kuma tunkarar kalubalen rashin tabbas a bangaren kula da sha’anin fasahar.
Wannan sabuwar nasara da aka cimma a taron da ya gudana a birnin Shanghai na kasar Sin, ta kasance tamkar share hawaye ga masu fargabar mummunan tasirin fasahohin zamani, ciki kuwa har da yawaita amfani da su ba bisa ka’ida ba ta fuskar soji da sauran miyagun laifuffuka. Ta hanyar kungiyar WAICO, mabambantan bangarori za su hada karfi da karfe wajen tsara kyawawan manufofi da ka’idojin da za su hana fasahohin na zamani lalata ginshikin zamantakewa da kuma samar da ci gaba mai ma’ana ba na mai hakar rijiya ba.
A kokarinta na sauke nauyin da ke wuyarta a matsayin babbar kasa a duniya, kasar Sin ta bakin shugaba Xi Jinping ta ba da shawarar bin ka’idar gudanar da al’amura a fili, da hadin gwiwar samun nasara ga dukkan bangarori, da bai wa juna sabbin fasahohi na zamani da bunkasa ci gaban sashen masana’antu mai amfani da fasahar AI. Ko da yake, masu neman kankane komai saboda jarin hujja, ba za su so hakan ba, amma kuma al’ummun duniya mafiya rinjaye sun san taimakon juna da yin hadin gwiwa su ne maganin kalubalen da ake fuskanta ba ma a bangaren fasahohin zamani ba, har da rashin tabbas da duniya ke kaka-ni-ka-yi a ciki.
Idan aka biye wa masu son a boye ko a zabi wadanda za su ci gajiyar fasahohin zamani ta hanyar da aka ga dama, fargabar da ake da ita ta fuskar amfani da su wajen aikata barna za ta ci gaba da karuwa har ta kai ga illata duk wasu muhimman sassa na rayuwa, domin a boye babu wanda zai san abubuwan da ake aikatawa.
Kasar Sin ta jaddada muhimmancin karfafa ilmantarwa kan hadurran fasahohin, da tabbatar da cewa komai na sha’anin AI ya kasance a hannun dan Adam, da karfafa tafiya da kowa da kowa wajen tsara ka’idoji da kuma raba cin gajiya ta yadda za a cike gibin da ke tsakanin hamshakan kasashe da masu tasowa.
Kafuwar WAICO ta kasance tamkar kaya ya tsinke a tushen kaba, domin ta zo a lokacin da ake tsananin bukata saboda karuwar fargabar duniya game da makomar fasahar AI. (Abdulrazaq Yahuza Jere)
