Ministan Yaɗa Labarai da Wayar da Kan Jama’a, Mohammed Idris, ya ce Shugaba Bola Tinubu bai taɓa ba shi umarnin yin ƙarya, ya tsare, ko ya gallaza wa kowane ɗan jarida ba, ko da kuwa suna suka gwamnatinsa.
Ya bayyana haka ne a ranar Laraba lokacin da ya karɓi baƙuncin shugabannin Ƙungiyar Editocin Nijeriya (NGE) a Abuja.
- UNHRC Ta Zartas Da Kudurin Sin Kan Kiyaye Hakkin Dan Adam Ta Hanyar Samun Ci Gaba
- Akwai Bukatar Sin Da Masar Su Zurfafa Hadin Gwiwa Domin Kare Muradunsu
Ministan ya bayyana cewa, ko da wasu rahotanni daga kafafen yaɗa labarai ko furucin wasu mutane na zama masu zafi ko ɓatanci, Shugaba Tinubu bai taɓa ce masa ya ɗauki matakin ramawa ba.
“Wasu lokutan kafafen labarai kan tayar da hankali,” in ji shi.
“Amma Shugaba Tinubu bai taɓa cewa na yi ƙarya ko na sauya gaskiya ko na kama masu laifi ba.”
Ya ƙara da cewa, Tinubu na mutunta dimokuraɗiyya da doka.
Haka kuma, gwamnati ta san cewa ba za ta iya aiki yadda ya kamata ba tare da kafafen yaɗa labarai ba.
Idris ya ce a baya, wasu jami’an gwamnati suna sukar gwamnati, amma shi kullum yana tattaunawa da ƙungiyar ’yan jarida da masu wallafa jaridu domin warware matsaloli cikin lumana.
“Idan muna yin daidai, ku yabe mu,” in ji shi.
“Idan kuma muna kuskure, ku faɗa mana cikin lumana domin mu inganta ayyukanmu.”
Ministan ya ce gwamnatin Tinubu tana da kyakkyawar mu’amala da kafafen labarai kuma hakan zai ci gaba.
Ya roƙi ’yan jarida ka da su ɗauki wasu ƙananan matsaloli su yi wa gwamnati hukunci a kai gaba ɗaya.
Ya kuma bayyana wani babban ci gaba da aka samu a Nijeriya na dab da samuwa domin za a karɓi baƙuncin Cibiyar Wayar da Kan Jama’a kan Hanyoyin Yaɗa Labarai (MIL) a Jami’ar Open University da haɗin gwiwar UNESCO.
Wannan cibiyar za ta taimaka wajen ilimantar da mutane kan labaran ƙarya da yaɗa jita-jita.
“Da zarar an amince, mutane daga sassa daban-daban na duniya za su riƙa zuwa Nijeriya domin koyon dabarun kafafen yaɗa labarai,” in ji shi.
