Ɗan takarar mataimakin shugaban ƙasa na jam’iyyar ADC, Mista Rotimi Amaechi, ya yi gargaɗin cewa hukuncin Babbar Kotun Tarayya kan shugabancin jam’iyyar na iya haifar da rikici da tashin hankali a ƙasar nan.
A ranar Alhamis ɗin da ta gabata ne Babbar Kotun Tarayya da ke Abuja ta soke shugabancin Kwamitin Ayyuka na Ƙasa (NWC) na jam’iyyar da tsohon Shugaban Majalisar Dattawa, David Mark, ke jagoranta.
Hukuncin ya kuma soke tsarin da ya samar da tsohon Mataimakin Shugaban Ƙasa, Atiku Abubakar, a matsayin ɗan takarar shugaban ƙasa na jam’iyyar a zaɓen 2027.
Hukuncin, wanda Mai Shari’a Peter Lifu ya yanke, ya kuma soke naɗin tsohon Ministan Harkokin Cikin Gida, Rauf Aregbesola, a matsayin Sakataren Ƙasa na jam’iyyar, da sauran matakan da shugabancin Mark ya ɗauka, ciki har da zaɓen ’yan takarar kujerun zaɓe.
Kotun ta kuma umarci Hukumar Zaɓe Mai Zaman Kanta ta Ƙasa (INEC) da kada ta amince ko ta aiwatar da duk wani mataki da aka ɗauka a taron Kwamitin Zartarwa na Ƙasa (NEC) na jam’iyyar karo na 99, wanda aka gudanar a ranar 27 ga Yuli, 2025.
Hukuncin ya biyo bayan ƙarar da tsohon Mataimakin Shugaban Jam’iyyar na Ƙasa a shiyyar Arewa maso Gabas, Nafiu Gombe, ya shigar mai lamba FHC/ABJ/CS/1819/2025, inda ya ƙalubalanci tsarin da David Mark da sauran mambobin kwamitin riƙon ƙwarya suka bi wajen karɓar jagorancin jam’iyyar.
