Wakilin dindindin na kasar Sin a MDD Fu Cong, ya ce matsalolin mashigin teku na Hormuz sun samo asali ne daga ayyukan soji da Amurka da Isra’ila suka kaddamar kan Iran ba bisa ka’ida ba, kuma mafita ga cikas da ke hana zirga-zirgar jiragen ruwa ta mashigin ita ce cimma cikakkiyar tsagaita wuta da gaggauta dakatar da yaki.
Fu Cong ya ce, mashigin Hormuz muhimmiyar hanyar jigilar kayayyaki da makamashi ce ta kasa da kasa, kuma kiyaye tsaro da kwanciyar hankali a yankin, da kuma tabbatar da zirga-zirgar jiragen ruwa yana cikin muradin al’ummun kasa da kasa baki daya.
Ya ce duk da cewa an riga an cimma yarjejeniyar tsagaita wuta ta wucin gadi, amma Amurka ta kara kaimin tura dakarun soji, tare da daukar matakan sanya shinge kai tsaye, matakin da ya kasance mai hadari kuma mai nuna rashin sauke nauyi dake wuyanta.
Mafita ga cikas da ke hana zirga-zirgar jiragen ruwa ta mashigin, ita ce cimma cikakkiyar tsagaita wuta da gaggauta dakatar da yaki, da kuma ciyar da yankin Gulf da Gabas ta Tsakiya gaba, a kan turbar zaman lafiya da kwanciyar hankali.
Fu Cong ya kuma ce, bangaren Sin yana yaba wa kokarin sulhu da kasashe kamar Pakistan suke yi, ya kuma bukaci bangarorin da abin ya shafa da su warware rigingimu ta hanyar siyasa da diflomasiyya.
Ya kuma nuna adawa da duk wani mataki na rushe tsagaita wuta, da kuma kara tsananta adawa. Har ila yau, bangaren Sin zai ci gaba da taka rawar gani wajen inganta zaman lafiya da kwanciyar hankali a yankin. (Amina Xu)
