Wata mata mai suna Sumaiya Abubakar ta amince a gaban kotu cewa ta taimaka wa mambobin ƙungiyar ISWAP wajen adana makamai da alburusai a Jihar Nasarawa.
An gurfanar da ita ne a gaban Babbar Kotun Tarayya da ke Abuja bisa tuhume-tuhume biyu da suka shafi ta’addanci.
Ana zarginta da aikata laifin ne a shekarar 2024 a yankin Shinge, cikin Ƙaramar Hukumar Lafia ta Jihar Nasarawa.
Gwamnatin Tarayya ta zarge ta da taimaka wa mambobin ISWAP, ta hanyar adana musu makamai da alburusai.
Laifin ya saɓa wa tanadin Dokar Hana Ta’addanci ta shekarar 2022.
Lokacin da aka karanta mata tuhume-tuhumen, ta musanta laifin farko, amma ta amince da aikata laifin na biyu.
Lauyan gwamnati ya buƙaci kotun ta yanke mata hukunci bisa laifin da ta amince da shi, sannan a janye tuhumar ta farko.
Lauyan da kw kare ta bai yi adawa da buƙatar ba, inda Mai Shari’a Salim Ibrahim ya soke tuhumar farko.
Sai dai alƙalin ya ce dole ne ɓangaren masu gabatar da ƙara ya sake duba bayanan shari’ar kafin kotu ta yanke hukunci kan tuhuma ta biyu.
Kotun ta ɗage ci gaba da sauraron shari’ar zuwa 14 ga watan Oktoba, 2026, sannan ta bayar da umarnin ci gaba da tsare Sumaiya a hannun Hukumar Tsaro ta Farin Kaya (DSS) har zuwa ranar sauraron ƙarar.
