A yau Jumma’a 15 ga watan Mayu, shugaba Xi Jinping ya gudanar da wata ganawa ta musamman cikin karamin rukuni da shugaban Amurka Trump, a Zhongnanhai, fadar shugaban kasar Sin.
Shugaba Xi ya nuna cewa, ziyarar shugaba Trump a wannan karo tana da muhimmanci matuka a tarihi har ta kafa wani tambari. Bangarorin biyu sun gina sabon matsayi na dangantakarsu mai dorewa da kuma amfani bisa manyan tsare-tsare.
Shugaban ya kuma ce, sun cimma muhimmiyar yarjejeniya kan kiyaye kwanciyar hankalin huldar kasuwanci da tattalin arziki, da fadada hadin gwiwa mai amfani a fannoni daban-daban, da kuma cimma matsaya daya da magance abun dake jawo hankulansu. Kasashen biyu kuma sun amince da karfafa tattaunawa da daidaita batutuwan shiyya-shiyya da na kasa da kasa. Wannan ziyarar tana da amfani ga inganta fahimtar juna da zurfafa amincewar juna da kuma kara faranta ran al’ummomin kasashen biyu.
A nasa bangaren, Trump ya bayyana cewa, wannan ziyarar tasa a Sin ta kasance mai matukar nasara, ta kuma ja hankalin duniya, kuma ba za a manta da ita ba.
Bangarorin biyu sun cimma jerin muhimman matsaya daya, da kulla yarjejeniyoyi da yawa, kuma sun warware matsaloli da dama, wanda ke da matukar amfani ga kasashen biyu da kuma duniya baki daya. Kazalika, ya bayyana cewa, yana fatan ci gaba da tuntubar shugaba Xi da gaske, kuma ya gayyace shi ya ziyarci Washington. A yammacin yau Jumma’a 15 ga wata ne shugaban kasar Amurka Donald Trump ya kammala ziyararsa a kasar Sin, inda ya tashi daga Beijing cikin jirgin sama. (Amina Xu)
