Wani bidiyo da ya bayyana a shafukan sada zumunta, ya nuna wani mutum da aka yi garkuwa da shi, Ahmed Abubakar Zakka, yana riƙe da jaririyarsa mai watanni shida, tare da roƙon jama’a su taimaka wajen kuɓutar da su, yayin da yake kan tsinin bindiga.
An yi garkuwa da Zakka tare da matarsa da ƙaramar ’yarsu ne a yankin Millennium City da ke Jihar Kaduna. Ya bayyana a cikin bidiyon cewa masu garkuwa da su na neman kuɗin fansa har naira miliyan 300 kafin su sake su.
Zakka, wanda ya yi magana da Hausa, ya yi kira ga ’yan Nijeriya da su taimaka wajen ganin an kuɓutar da su.
An yi garkuwa da iyalan ne a ranar 6 ga Oktoba, 2026, lokacin da ’yan bindiga suka kai hari a rukunin gidaje na Alrahus Estate, da ke Millennium City, Ƙaramar Hukumar Chikun ta Jihar Kaduna.
Jaridar Daily Trust ta ruwaito cewa maharan sun shiga rukunin gidajen da misalin ƙarfe 11:30 na dare, inda suka riƙa shiga gidaje ɗaya bayan ɗaya domin neman waɗanda za su sace.
Rahotanni sun ce ’yan bindigar sun sace Zakka, matarsa da jaririyarsu mai watanni shida bayan sun kutsa cikin wani gidan da ke maƙwabtaka da nasu.
Haka kuma, maharan sun yi garkuwa da wata mata mai juna biyu, wadda mijinta, Abdulladir Bello, yake Abuja a lokacin da lamarin ya faru.
