Shugaban Ƙasa Bola Tinubu ya ce ’yan Nijeriya za su iya sukarsa ko zaginsa ba tare da tsoron fuskantar hukunci daga gwamnatinsa ba.
Tinubu ya bayyana haka ne ranar Alhamis a wajen bikin cika shekaru 100 da kafuwar jaridar Daily Times a Abuja.
Sakataren Gwamnatin Tarayya, George Akume ne, ya wakilce shi a wajen taron.
Shugaban ya ce jure suka da kuma ’yancin aikin jarida na daga cikin muhimman manufofin gwamnatinsa.
Ya kuma ce sauye-sauyen da gwamnatinsa ke yi na da nufin ƙarfafa tattalin arziƙin Nijeriya, inganta ababen more rayuwa, jawo masu zuba jari da samar wa matasa damammaki.
Tinubu ya yaba wa Daily Times bisa gudummawar da ta bayar wajen aikin jarida da kuma adana tarihin Nijeriya tsawon shekaru 100.
Ya kuma ƙaddamar da littafin Nigerian Grand Book, wanda ya ce an samar da shi ne domin adana tarihin ƙasar da kuma karrama ’yan Nijeriya da suka taimaka wajen ci gaban ƙasar.
Tinubu ya yi gargaɗin cewa yawan al’ummar Nijeriya na iya kaiwa miliyan 450 nan da shekarar 2050, lamarin da zai ƙara matsin lamba kan samar da abinci da ruwa.
