Ma’aikatar harkokin wajen kasar Sin ta ce, yankin Taiwan na kasar Sin ba shi dalili ko iko ko kuma hujjar halartar babban taron hukumar lafiya ta duniya (WHA), har sai sai gwamnatin tsakiya ta kasar ta amince masa.
Kakakin ma’aikatar ne ya bayyana haka yau Litinin, lokacin da yake tsokaci kan matakin da WHA ta dauka na kin sanya bukatar Taiwan ta halartar taron a matsayin ‘yar kallo, cikin ajandarta.
A cewar kakakin, an shafe wani lokaci yanzu, hukumomin jam’iyyar DPP da wasu kasashe suna kokarin mayar da hannu agogo baya, inda suke kalubalanta da kokarin hargitsa kudurin MDD mai lamba 2758, domin kalubalantar manufar Sin daya tak a duniya. Ya ce, wannan ba kalubale ne ga cikkaken ‘yancin kasar Sin da iko kan yankunanta ba, kalubale ne ga matsaya ta adalci da kasa da kasa suka cimma da kuma tsarin odar duniya, bayan yakin duniya na II. Ya ce, kasa da kasa sun amince da matakin Sin na kin amincewa Taiwan ta halarci taron na bana, lamarin da ya nuna cewa, yarda da manufar Sin daya tak a duniya, shi ne burin al’umma da ya dace da yanayin da ake ciki, kuma shi ne abu mafi dacewa. Bugu da kari, kakakin ya ce, yadda kasa da kasa suka amince da manufar kasar Sin daya tak a duniya, abu ne da ba za a iya kalubalanta ba. (Fa’iza Mustapha)
