Rundunar ’Yansandan Jihar Kano ta gayyaci dan takarar majalisar dokokin jihar mai wakiltar Karamar Hukumar Gwale a jam’iyyar NDC, Aminu Abdullahi Warkal, domin amsa tambayoyi kan wani bidiyo da aka yada a kafafen sada zumunta.
A cikin bidiyon, ana zargin an ga Warkal yana nuna wata bindiga a wani taron siyasa, wadda rundunar ta ce ana kyautata zaton cewa bindigar Pump Action ce.
Kakakin Rundunar ’Yansandan Kano, SP Abdullahi Haruna Kiyawa, ya ce rundunar ta gano bidiyon ne yayin da take sa ido kan abubuwan da ake wallafawa a kafafen intanet.
Ya ce idan bincike ya tabbatar da zargin, nuna bindigar ba bisa ka’ida ba na iya zama take dokokin mallaka da amfani da makamai, tare da yiwuwar tayar da hankalin jama’a da barazana ga zaman lafiya.
A cewar rundunar, Kwamishinan ’Yansandan Kano, CP Ibrahim Adamu Bakori, ne ya bayar da umarnin gayyatar Warkal, wanda a yanzu yake ofishin ’yansanda yana amsa tambayoyi kan lamarin.
