Rundunar ’yansandan Jihar Kano ta ƙaddamar da wani sabon sashe domin yaƙi da manyan laifuka kamar garkuwa da mutane, fashi da makami da kuma satar motoci.
Kwamishinan ’yansandan jihar, Ibrahim Adamu Bakori, ne ya ƙaddamar da rundunar mai suna VCRU a ranar Litinin.
Ya ce an kafa rundunar ne bisa umarnin Sufeto Janar na ’yansanda, Olatunji Rilwan Disu, tare da bin dokar ’yansanda ta shekarar 2020.
Bakori ya bayyana cewa sabon sashen zai riƙa aiki da bayanan sirri da kuma haɗin kan jama’a domin magance matsalolin tsaro da ke ƙaruwa a wasu yankunan Kano.
Ya ce an bai wa jami’an rundunar horo na musamman kan yadda za su yaƙi manyan laifuka tare da mutunta haƙƙin bil’adama.
Kwamishinan ya kuma yaba wa gwamna Abba Kabir Yusuf saboda goyon bayan da yake bai wa harkokin tsaro a jihar.
Haka kuma ya roƙi sarakuna da shugabannin al’umma da su riƙa taimaka wa jami’an tsaro da bayanan masu aikata laifuka domin inganta tsaro a Kano.
