Alkaluman da aka fitar a hukumance sun nuna cewa, daga farkon wannan shekarar zuwa yanzu, yawan zirga-zirgar jiragen kasa tsakanin Sin da Turai kan layin dogo na yankin arewa maso gabashin Sin, ya zarce 3,000.
Layin dogon na yankin arewa maso gabashin Sin na jiragen kasa masu zirga-zirga tsakanin Sin da Turai ya kunshi manyan tashoshin jiragen kasa guda uku, wato Manzhouli da Suifenhe da Tongjiangbei. A halin yanzu, an samar da layukan dogo guda 27, wadanda suka kai kasashe 14 ciki har da Poland, da Jamus, da Netherlands, tare da hada su da biranen Sin sama da 60 kamar Changsha, Zhengzhou, da Chengdu. Alkaluman sun nuna cewa daga watan Janairu zuwa Afrilun bana, yawan zirga-zirgar jiragen kasa tsakanin Sin da Turai kan layin dogo na arewa maso gabashin Sin ya kai kashi 32.1% na jimilar zirga-zirgar jiragen kasa a duk fadin kasar Sin.
A matsayin wata muhimmiyar tashar jirgin kasa a yankin arewa maso gabas, tashar Manzhouli ta Sin tana ci gaba da aiki da kyau. Kuma zuwa yanzu, tashar ta yi jigilar jimillar kayayyakin shige da fice fiye da tan miliyan 9, wadda ta karu da kashi 1.2% bisa makamancin lokacin a bara, inda ta kafa sabon tarihi. Bugu da kari, tashar Suifenhe ita ma tana ci gaba da inganta karfinta na tallafawa ayyukan jigilar kayayyaki na kasa da kasa ta hanyar inganta matakan ayyukanta. A wannan shekarar, Tashar Suifenhe ta samu yawan zirga-zirgar jiragen kasa tsakanin Sin da Turai 402, wanda ya karu da kashi 150% bisa makamancin lokaci a bara.(Safiyah Ma)
