Kungiyar ‘Yan Ƙwadago ta Nijeriya (NLC) ta zargi Gwamnatin Tarayya da amfana da karin kuɗaɗen shiga daga man fetur sakamakon tashin farashin mai, yayin da ma’aikata da sauran ’yan Nijeriya ke fama da tsadar sufuri da abinci da kuma raguwar samun kudin sayayya.
Shugaban NLC, Kwamared Joe Ajaero, ya bukaci gwamnati ta ɗauki matakan gaggawa na rage raɗaɗin ƙarin farashin mai, ta hanyar amfani da ƙarin kuɗaɗen da ake samu daga hauhawar farashin ɗanyen mai a kasuwannin duniya wajen tallafa wa ma’aikata da sauran masu ƙaramin ƙarfi.
Ajaero ya bayyana hakan ne a taron koli na kasa na shekarar 2026 kan shirin yin ritaya, inda ya ce ƙarin farashin ɗanyen mai ya samar wa ƙasashe masu arzikin man fetur, ciki har da Nijeriya, ƙarin kuɗaɗen shiga.
Ya tambayi dalilin da ya sa, ba za a yi amfani da wannan ƙarin kuɗin wajen rage wa ’yan ƙasa raɗaɗin tsadar man fetur da hauhawar farashin kayayyaki ba.
A nasa ɓangaren, Ministan Sufurin Jiragen Sama da Ci gaban Sararin Samaniya, Festus Keyamo, ya ce mafi ƙarancin albashi na ƙasa na N70,000 a yanzu bai isa ya tinkari matsin tattalin arzikin da ma’aikata ke fuskanta ba.
