Darakta mai kula da harkokin matasa na Atiku Pulse, Hon. Lawali Isah Gusau, ya ce matsin lamba da ake yi i wa jam’iyyar adawa ta ADC a Kaduna ya sa jam’iyyar ta ƙara samun karɓuwa a jihar.
Lawali ya ce sama da ƙungiyoyi 2,000 ne suka bar jam’iyyar APC mai mulki a Kaduna suka koma ADC.
Ya bayyana hakan ne yayin da yake magana da manema labarai a Gusau, inda ya zargi gwamnatin Kaduna da takura wa jam’iyyun adawa, musamman ’yan takarar ADC.
Ya yi kira ga shugabannin APC da su guji ɗaukar irin wannan mataki, yana mai cewa abin na iya haifar da sakamakon da ba su zata ba.
Lawali ya kawo misalin zaɓen 2023 a Zamfara, inda ya ce duk da ƙalubalen da ADC ta fuskanta, jam’iyyar ta samu nasara a wasu mazaɓu.
Ya ce hakan ya kamata ya zama darasi ga APC a Kaduna.
Ya kuma yi kira ga al’ummar Arewa da su yi tunani sosai kafin zaɓen 2027, su guji bin son rai ko wasu ’yan siyasa kawai, sannan su zaɓi shugabannin da suke ganin za su yi aiki domin amfanin jama’a.
Lawali ya kuma ce idan ’yan Nijeriya suka zaɓi ADC da ’yan takararta a zaɓen 2027, yana da yaƙinin cewa za a iya kawo ƙarshen matsalolin tsaro da ta’addanci a ƙasar.
Ya bayyana cewa wannan shi ne ra’ayinsa a matsayin Daraktan Harkokin Matasa na Atiku Pulse kuma ɗan siyasa mazaunin Kaduna.
