Rundunar ƴansanda ta Jihar Kebbi ta samu nasarar gano ɗimbin kayayyakin wutar lantarki da wasu ɓata-gari suka sace a Ƙaramar Hukumar Bunza.
Mai magana da yawun rundunar, SP Bashir Usman, wanda ya tabbatar da faruwar lamarin a cikin wata sanarwa da ya raba wa manema labarai, ya bayyana cewa an ƙwato waɗannan kayayyakin ne a ranar 25 ga watan Agusta a lokacin wani sumame da jami’ansu suka kai a yankin Kara da ke cikin garin na Bunza.
A cewar SP Usman, rundunar ta ƙaddamar da wannan sumame ne biyo bayan ƙorafe-ƙorafe da kuma fargabar da ake da ita kan yawaitar sace-sace da ɓata kayayyakin wutar lantarki a yankin. Ya bayyana cewa wannan dabi’a ta ɓarnatar da kayan amfanin gwamnati ta jefa al’ummomi da dama cikin duhu tare da katse musu wutar lantarki.
Sanarwar ta tabbatar da cewa, a yayin sumamen, jami’an ‘yansandan sun samu nasarar ƙwato damin wayoyin wutar lantarki (cables) guda 10 da kuma wasu buhuna bakwai maƙare da irin waɗannan wayoyin daga hannun ɓata-garin.
Rundunar ‘yansandan ta kuma tabbatar da kama wani wanda ake zargi mai suna Mustapha Abubakar dangane da satar, inda ta ce tuni har an gurfanar da shi a gaban kuliya. SP Usman ya ƙara da cewa wannan nasara na nuni da aniyar rundunar na ganin ta daƙile ayyukan ɗaiɗaikun mutane da kuma ƙungiyoyin ɓata-gari da suka sa a gaba satar kayan amfanin al’umma.
Kamar yadda sanarwar ta nuna, Kwamishinan ‘Yansandan Jihar, Umar M. Hadejia, ya sake nanata ƙudurinsu na kare kayayyakin gwamnati da tabbatar da cewa duk wanda aka kama ya fuskanci hukunci daidai da doka, tare da yin kira ga mazauna yankin da su riƙa kai rahoton duk wani motsi da ba su yarda da shi ba.
