Ɗan majalisar wakilai mai wakiltar mazaɓar Kiru/Bebeji a Jihar Kano, Abdulmumin Jibrin, ya shiga wata takaddama mai zafi da abokin takararsa, Sunusi Majidaɗi Ƙiru da wasu daga cikin mutanen mazaɓarsa na bangaren Ƙiru, lamarin da ya karade kafafen sada zumunta.
A cikin wani bidiyo da ke yawo a shafukan sada zumunta, an ga ɗan majalisar — wanda ke wa’adi na huɗu a Majalisar Tarayya — yana musayar kalamai da jama’a, inda a wani lokaci ya riƙa furta kalamai masu zafi yayin da mutane suka taru a kusa da shi.
Ba a tabbatar da ainihin abin da ya haifar da takaddamar ba a hukumance. Sai dai wasu masu lura da al’amuran siyasa sun danganta lamarin da siyasar yankin, musamman yayin da ake shirin zaɓe mai zuwa.
Wata majiya ta bayyana cewa lamarin ya faru ne lokacin da Jibril Kopa ya ƙaurace wa gaisawa da Sunusi Majidaɗi Ƙiru, bayan wani zaman sulhu da aka gudanar kwanan nan domin fidda ‘yan takara a jam’iyyar APC a Jihar Kano, ƙarƙashin jagorancin gwamna Alhaji Abba Kabiru Yusuf.
A wani bidiyo daban da shi ma ke yawo, an ga wasu daga cikin mutanen yankin suna bayyana rashin jin daɗinsu da Jibrin, inda suke rera masa wakar, “Ba ma yi,” ma’ana “ba ma sonka kuma.”
Har zuwa lokacin haɗa wannan rahoto, Honorabul Jibrin bai fitar da wata sanarwa a hukumance ba dangane da lamarin.
