Wani jigo a jam’iyyar African Democratic Congress, Dele Momodu, ya ce tsohon Mataimakin Shugaban Ƙasar Atiku Abubakar ba shi da isassun kuɗaɗe da za su iya gogayya da na shugaban ƙasa Bola Ahmed Tinubu gabanin zaɓen shugaban ƙasa na 2027.
Momodu ya bayyana hakan ne yayin wata hira a shirin Politics Today na Channels Television, inda ya nuna damuwa kan abin da ya kira matsawar siyasar Nijeriya zuwa tsarin jam’iyya ɗaya kacal.
- Tinubu Ya Miƙa Sunan Taiwo Oyedele A Matsayin Ƙaramin Ministan Kuɗi
- Gwamnatin Kano Ta Rushe Ma’aikatar Ilimi Mai Zurfi, Ta Haɗe Ta Da Ma’aikatar Ilimi
Ya kwatanta halin siyasar ƙasar da lokacin mulkin tsohon shugaban mulkin soja Sani Abacha, yana mai cewa akwai babban giɓi tsakanin kuɗaɗen kamfen na Tinubu da na Atiku. A cewarsa, Atiku ba shi da ko kashi 1 cikin 100 na abin da Tinubu zai iya kashewa wajen siyasa.
Sai dai Momodu ya jaddada cewa goyon bayansa ga Atiku ba don kuɗi ba ne, illa saboda muhimmancin samun ƙwararren ɓangaren adawa a siyasar Nijeriya. Ya ce duk da wasu zarge-zargen cewa yana iya komawa ɓangaren Tinubu, bai taba halartar wata ganawar siyasa a ɓoye ba tare da sanin Atiku ba.
Ya kuma ce duk da ra’ayin wasu cewa ‘yan siyasa na tsoron shugaban ƙasa, a zahiri gwamnatin ce ke tsoron martanin ‘yan Nijeriya, yana mai ƙara cewa jama’a na fuskantar matsin rayuwa yayin da gwamnati ke nuna kamar ba ta fahimci halin da ake ciki ba.
