Gwamnan Jihar Kano, Abba Kabir Yusuf, ya bayyana cewa Kano za ta jagoranci jihohin Arewa wajen samar wa Shugaba Bola Ahmed Tinubu gagarumar nasara a zaɓen shugaban ƙasa na 2027.
Gwamnan ya bayyana hakan ne a ranar Asabar a Abuja, yayin ƙaddamar da ofishin yaƙin neman zaɓen ƙungiyar Arewa for Asiwaju (A4A), wadda aka kafa domin tattara goyon baya ga Tinubu da Mataimakin Shugaban Ƙasa, Kashim Shettima, a faɗin jihohin Arewa 19 da Babban Birnin Tarayya, Abuja.
Yusuf ya ce Kano, wadda ke da yawan masu zaɓe a yankin Arewa, za ta taka muhimmiyar rawa wajen tabbatar da nasarar jam’iyyar APC a zaɓen mai zuwa.
Ya bayyana kwarin gwiwarsa cewa za a samu gagarumar fitowar masu zaɓe domin marawa Tinubu baya a zaɓen shugaban ƙasa na 2027.
Gwamnan ya kuma sake jaddada goyon bayansa ga ƙudirin Tinubu na neman wa’adin mulki na biyu, yana mai bayyana ƙungiyar A4A a matsayin wata kafa da za ta taimaka wajen ƙarfafa hulɗar siyasa da tattara goyon bayan jama’a gabanin zaɓen.
Da yake jawabi a wajen taron, Mataimakin Shugaban Ƙasa, Kashim Shettima, ya ce goyon bayan siyasa ga gwamnati ya kamata ya kasance tare da riƙon amana, kyakkyawan shugabanci da kuma aiwatar da manufofin da za su inganta rayuwar ’yan Nijeriya.
Shettima ya bayyana cewa Arewa ta nuna goyon bayanta ga gwamnatin Tinubu, amma ya jaddada muhimmancin samar da sakamako na zahiri da zai tabbatar da cewa gwamnati ta cancanci amincewar da aka ba ta.
Ya amince cewa ’yan Nijeriya na fuskantar ƙalubalen tattalin arziki, yana mai buƙatar gwamnati ta kasance mai sauraron koke-koken jama’a da kuma ɗaukar matakan magance matsalolinsu.
Mataimakin shugaban ƙasar ya kuma jaddada muhimmancin ba da fifiko ga tsaro, ilimi, rage talauci da samar da damarmakin tattalin arziki ga al’umma.
.
