1. Kula da Tsabtar Farce:
Ki rika kula da tsabtar farcenki. Idan kina tara farce tare da sanya lalle ko jan farce, ki tabbata farcenki ba ya tara datti. Idan kuma ba mai tara farce ba ce, ki rika yanke farce tare da gyara shi akai-akai. Hakan yana nuna tsabta, kwarewa da kuma kula da kai.
2. Amfani Da Man Gyaran Jiki:
Mata su rika kula da fatarsu. Man gyaran jiki ba lallai sai na sauya launin fata ba. Ki zabi man da ya dace da fatar jikinki, wanda zai taimaka wajen fito da kyawun launinki na asali tare da kiyaye fata daga bushewa.
Idan kina da matsalar fata, yana da kyau ki nemi shawarar likitan fata domin samun maganin da ya dace. Kula da fata na daga cikin abubuwan da ke kara wa mace kima da kwarjini.
3. Kamshi Mai Dadi
Ki kasance mai kamshi a kowane lokaci. Ki samu abin shafawa da ke hana warin jiki sannan ki yi amfani da turare mai dadin kamshi. Tsabta da kamshi suna daga cikin abubuwan da ke sa mutum ya kasance abin girmamawa da karbuwa a cikin al’umma.
4. Kula da Tsabtar Hakora:
Bayan goge baki akai-akai, yana da muhimmanci a kula da lafiya da tsabtar hakora. Idan kina da matsalar canjin launin hakora, za ki iya neman taimakon kwararren likitan hakora ko amfani da kayan goge hakora masu inganci bisa shawarar masana.
Fararen hakora masu tsafta suna kara wa murmushi kyau da armashi.
5. Kula da Gashi da Kai:
Gashi da fatar kai na bukatar kulawa ta musamman. Ki rika wanke kai akai-akai domin kauce wa wari da datti. Bayan wankewa, ki tabbatar kin busar da gashin yadda ya kamata.
Idan kina yin kitso, kada ki bar shi ya dade sosai ba tare da an cire shi an wanke kai ba. Hakan yana taimakawa wajen kiyaye lafiyar gashi da fatar kai. Idan kuma ba kya yin kitso, ki rika ba gashinki kulawar da ta dace domin ya kasance cikin koshin lafiya.
Discussion about this post