Kamfanin Matatar Dangote ya fara sayar da hannayen jarinsa ga jama’a, abin da ake kallon zai zama wani babban ci gaba a kasuwannin hannayen jari na Afirka. Ga muhimman abubuwa biyar da masu zuba jari ya kamata su sani:
1. IPO Mafi Girma A Tarihin Kasuwar Hannayen Jari Ta Afirka
Matatar Dangote na neman tara kusan Naira tiriliyan 2.15, kwatankwacin dala biliyan 1.6, ta hanyar sayar da hannayen jari biliyan 4.1. Wannan tayin ya kimanta darajar kamfanin tsakanin dala biliyan 40 zuwa 49, wanda zai iya sa ya wakilci kusan kashi ɗaya bisa uku na jimillar darajar kasuwar hada-hadar hannun jarin Nijeriya (NGX).
2. Ranar Fara Sayarwa Da Mafi ƙarancin Hannayen Da Za A Iya Siya
An buɗe littafin karɓar umarnin sayen hannayen jarin a yau 14 ga Satumba, 2026, kuma za a ci-gaba har zuwa 13 ga Oktoba, 2026. Ana sayar da kowane hannun jari kan Naira 525, yayin da mafi ƙarancin adadin da mutum zai iya saya shi ne hannaye 10, wanda ya kai Naira 5,250.
3. Girman Aikin Matatar Da Shirin Faɗaɗa Ta
Matatar da ke Lekki Free Zone a Jihar Legas, ta kai cikakken ƙarfin tace ɗanyen mai na ganga 650,000 a rana. Ana kuma shirin amfani da kuɗaɗen da za a samu daga sayar da hannun jarin wajen faɗaɗa ƙarfin matatar zuwa ganga miliyan 1.4 a rana, tare da ƙara samar da sinadaran petrochemical.
4. Nigerian Exchange Za Ta Zama Babbar Kasuwar Hannayen Jarin
Za a fara jera hannayen jarin kamfanin kai tsaye a allon NGX. Kamfanin ya ce a halin yanzu zai fi mayar da hankali kan kasuwar NGX, yayin da ake shirin kai hannayen jarin jeri na biyu a kasuwannin duniya, kamar Johannesburg Stock Exchange ko London Stock Exchange, nan gaba bayan kamfanin ya samu isasshen tarihin kasancewa a kasuwar hannayen jari.
5. Rage Dogaro Da Shigo Da Man Fetur Da Kuma Ribar Da Ke Da Alaƙa Da Dala
Matatar Dangote ta taimaka wajen sauya matsayin Nijeriya daga ƙasar da ke dogaro da shigo da tataccen man fetur zuwa ƙasar da ke samarwa kanta tare da fitar da wasu kayayyakin zuwa kasuwannin ƙasashen waje. Tsarin rabon riba na kamfanin na iya bai wa masu hannayen jari kariya daga tasirin sauyin darajar Naira.
