Babban bankin ƙasa CBN, ya ɗage ranar fara ƙaƙaba dokar tabbatar da tsaro ta geo-fencing ga na’urorin cirar kuɗi (PoS) zuwa 1 ga Agusta, 2026, domin bai wa cibiyoyin kuɗi da masu yin sana’ar cire wa da biyan kuɗi ƙarin lokaci su cika sabbin ƙa’idojin da aka gindaya.
A wata sanarwa da Daraktar sashin kula da tsarin biyan kuɗi, Rakiya Yusuf, ta sanya wa hannu, babban bankin ya ce matakin ya biyo bayan shawarwari da masu ruwa da tsaki da kuma matsalolin fasaha da suka taso wajen aiwatar da umarnin da aka bayar tun a shekarar 2025.
CBN ya kuma ƙara girman yankin da aka amince na geo-fencing daga mita 10 zuwa mita 70. Tsarin geo-fencing na nufin takaita amfani da na’urar PoS zuwa wurin kasuwancin da aka yi wa rajista domin inganta sa ido kan hada-hadar kuɗi da rage damfara a tsarin biyan kuɗi na zamani.
Bankin ya umarci dukkan cibiyoyin da abin ya shafa da su gabatar da shaidar bin umarnin kafin 31 ga Yuli, 2026, tare da warware duk wata matsalar fasaha da ke tsakaninsu da tsarin musayar bayanan kuɗi na ƙasa domin tabbatar da aiwatar da dokar cikin sauƙi.
