Rundunar ’Yansandan Nijeriya a Jihar Bauchi ta kama mutane biyar da ake zargi da mallakar sassan jikin ɗan-adam da kuma wasu kayayyakin da ake amfani da su wajen tsafi domin neman kuɗi a Bauchi.
Waɗanda aka kama sun haɗa da Abdullahi Idris, Sani Haruna, Auwal Umar, Abubakar Yusuf da Sharu Sale.
Jami’in Hulɗa da Jama’a na Rundunar ’Yansandan Shiyya ta 12, SP Jalige Mohammed ne, ya bayyana hakan cikin wata sanarwa.
Ya ce sashen leƙen asiri na rundunar ya kama waɗanda ake zargin a ranar 26 ga watan Agusta 2026.
A cewarsa, jami’an tsaro sun ƙwato idanu biyu da ake zargin na mutum ne, da wasu fararen kaya, jajayen tsummokara da sauran kayayyakin da ake zargin ana amfani da su wajen yin tsafin neman kuɗi.
Jalige ya ce waɗanda ake zargin suna hannun ’yansanda kuma ana ci gaba da yi musu tambayoyi yayin da bincike ke gudana.
Ya ƙara da cewa binciken zai taimaka wajen gano asalin kayayyakin da aka ƙwato da kuma ko akwai wasu mutane da ke da hannu a lamarin.
Rundunar ta ce za ta gurfanar da waɗanda ake zargin a gaban kotu bayan kammala bincike.
Mataimakin Sufeto-Janar na ’Yansanda mai kula da Shiyya ta 12, AIG Vungmoh S. M. Kwaimo, ya yi Allah-wadai da lamarin, tare da kira ga jama’a da su kasance masu taka-tsantsan.
Ya kuma buƙaci jama’a da su kai rahoton duk wani mutum ko wani abu da suke zargi ga ofishin ’yansanda mafi kusa da su.
