Hukumar Kula da Shige da Fice ta Nijeriya (NIS) ta tabbatar da kisan ɗaya daga cikin jami’anta, Ibrahim Usman Babagiwa, yayin da ’yan bindiga suka kai sabbin hare-hare a Jihar Neja, inda suka kashe mazauna ƙauyen huɗu tare da ƙona wata kasuwa.
Jami’in hulɗa da jama’a na rundunar NIS ta Jihar Neja, Mohammed Abubakar, ne ya tabbatar da kisan jami’in.
Ya ce Babagiwa da wani Sufeto na Shige da Fice suna gudanar da aikin sa ido a yankin Tungan Taya–Woko lokacin da ’yan bindiga suka kai musu hari.
A wani hari na daban da aka kai a Ƙaramar Hukumar Mashegu, wadda ke da iyaka da Ƙaramar Hukumar Borgu, an kashe mazauna ƙauye huɗu tare da ƙona wata kasuwa.
Rahotanni sun nuna cewa harin ya biyo bayan ƙin biyan harajin da ’yan bindigar suka kakaba wa mazauna yankin kafin su girbe amfanin gonakinsu.
Wani mazaunin ƙauyen, Mohammed Aliyu, wanda ya tabbatar wa jaridar LEADERSHIP da faruwar lamarin ta wayar tarho, ya ce al’ummar yankin sun bar gidajensu gaba ɗaya sakamakon harin.
Ya ƙara da cewa ’yan bindigar sun ƙona kasuwar kurmus, yayin da suka gudanar da ayyukansu ba tare da wata tangarda ba.
