An shiga firgici a garin Keffi, da ke karamar hukumar Keffi a jihar Nasarawa sakamakon fashewar wani abu da ake kyautata zaton Bam ne da safiyar ranar Lahadi.
An tabbatar da mutuwar mutane biyu sakamakon fashewar bam din.
Fashewar, a cewar majiyoyi, ta afku ne daura da babban asibitin da ke kan titin Nasarawa a garin Keffi.
Wakilinmu ya tattaro cewa, abun da ya fashe wanda ake kyautata zaton bam ne, ya fashe ne acikin wani gida da ke yankin, wanda wasu mutane biyu ne kacal suke haya a cikin gidan, kuma su biyun ne kadai suka mutu sakamakon fashewar.
An tattaro cewa mutanen, basu cika zama acikin gidan ba kuma a yammacin ranar Asabar suka dawo daga tafiya.
Wata majiya ta ce sa’o’i kadan bayan isowarsu wasu jami’an hukumar tsaro ta farin kaya (DSS) suka kewaye ginin.
A cewar wata majiya, mai yiwuwa wadanda suka mutu a lamarin, da gangan suka tayar da bam din yayin da suka ga jami’an tsaron.
Majiyar ta lura cewa mazauna yankin da dama sun tsere daga yankin a lokacin da lamarin ya faru.
