Kakakin rundunar ‘yansandan Jihar Legas, Benjamin Hundeyin ya bayyana cewa, an gurfanar da wata budurwa a jihar mai suna Olufunmilayo Brioluwa, kan cin zarafin dan sanda.
Benjamin wanda ya sanar da hakan a ranar Talata, ya ce, Olufunmilayo ta ci zarafin dansandan ne a yankin Oyingbo da ke jihar a lokacin da aka dakatar da ita don a caje ta.
- Za A Riƙa Tunawa Da Mijina A Matsayin Gwarzon Gina Rayuwar Matasa –Aisha Buhari
- Kasar Sin Da Kasashe Biyar Na Tsakiyar Asiya Sun Bude Sabon Babi Na Sada Zumunta Tsakaninsu
An ruwaito cewa, budurwar ta ci kwalar kakakin dansandan ne, tare da yi masa tsageranci.
An gurfanar da Olufunmilayo ne, a kotun majistare da mai shari’a Alkali Alao M.O ke jagoranta da ke a karamar hukumar Eti-Osa da ke cikin jihar, inda ta amsa laifin tuhumar da ake yi mata.
Alkalin kotun ya amince da rokon dan sanda mai gabatar da kara ya gabatar wa da kotun na ajiye Olufunmilayo a gidan gyaran hali na kwana 21 har sai an kammala gudanar da bincike.
An kai Olufunmilayo ajiya a gidan gyaran hali na Kirikiri har sai zuwa ranar 6 ga watan Yuni kafin a dawo kotun a ci gaba da sauraron karar.
Wannan cin zarafin na dan sanda ya zo daidai da awanni, bayan da aka gurfanar da mawaki Seun Kuti kan cin zarafin wani dan sanda a yayin da yake sanye da kakinsa.
