Rundunar ‘yansanda a Jihar Adamawa ta kama wasu mutum biyu da ake zargi da kashe wani mutum mai suna Umaru da aka zarga da maita.
Wadanda ake tuhumar sun hada da Adamu Alhaji Bamu mai shekaru 35 da kuma Manu Alhaji Bamu mai shekaru 32 da ke kauyen Kila da ke karamar hukumar Toungo a jihar.
- ‘Yansanda Sun Cafke Ɗan Banga Kan Zargin Kashe Mutum 2 Kan Rikicin Gona A Adamawa
- An Kama Mutane 2 Da Laifin Kashe Wani Mutum Kan ‘Maita’ A Adamawa
Wadanda ake zargin duk sun amsa laifinsu. Kazalika sun shaida wa jami’in hulda da jama’a na rundunar ‘yansandan jihar, SP Suleiman Yahaya Nguroje, cewa marigayin ya kashe ‘ya’yan Adamu biyu.
Da yake bayyana yadda lamarin ya faru, Adamu ya ce marigayin ba a haife shi a matsayin maye ba amma an shigar da shi ne a lokacin da ya rasa shanunsa duka. Ya kara da cewa tun da farko marigayin ya sanar da su kudirin sa na sayen bokaye da nufin kashe mahaifinsa domin ya gaji shanunsa.
Ya kuma kara da cewa wanda abin ya shafa ya fara yi wa ‘ya’yan Adamu sihiri ne bayan ya kasa kashe mahaifinsa kamar yadda ya tsara.
Adamu ya yi nuni da cewa Umaru ya kashe ‘yarsa da aka fi sani da Hurera daga baya kuma Mumuni, inda ya dage cewa ba ya nadamar abin da ya aikata.
Wanda ake zargin ya ce sun yi arba da Umaru har sau hudu yayin da ’yan uwansa suka yi masa duka da sanduna har ta kai ga mutuwarsa.
