Kungiyar kwallon kafa ta Arsenal FC ta samu karin kwarin gwiwa kafin wasansu na kusa da na karshe na gasar zakarun Turai da zata hadu da Sporting CP ta Portugal bayan yan wasanta biyu Declan Rice da Gabriel Magalhães sun dawo atisaye, duk da cewa ba lallai Bukayo Saka ya buga wasan na ranar Talata ba.
Kamar yadda BBC sport ta ruwaito a yau Litinin, Rice ya dawo atisayen tare da tawagar Arsenal tun bayan raunin da ya samu a wasannin kasa da kasa a karshen watan Maris, dawowarsu ta zama wata hobbasa ga koci Mikel Arteta wanda ke fatan ganin kungiyar ta dawo kan ganiyarta bayan rashin nasarar da tayi a hannun Southampton a gasar FA Cup da suka buga.
Dan wasan baya Gabriel shi ma ya halarci atisayen Arsenal na yau a sansanin daukar horon kungiyar dake London Colney, bayan an tilasta masa barin filin wasa bayan raunin da ya samu a rashin nasarar da sukayi a hannun Southampton, hakan ya nuna cewar raunin da dan wasan bayan na kasar Brazil ya samu ba mai muni bane.
Sai dai duk da haka, Saka bai halarci daukar horon na ranar Litinin ba, wanda hakan ya jefa shakku kan kasancewarsa cikin yan wasanda zasu kara da Sporting, Arsenal na fatan lashe gasar Zakarun Turai a karon farko a tarihinsu, da alama kuma wannan shekarar kungiyar ta Landan na tafe da sa’a inda zuwa yanzu ko sau daya basuyi rashin nasara ba a gasar.
