Babban jigo a jam’iyyar NNPP, Buba Galadima ya bayyana cewa dan takarar shugaban kasa a jam’iyyar PDP, Atiku Abubakar, na ci gaba da tura wasu fitattun mutane zuwa wurin Rabi’u Musa Kwankwaso don ya janye tare da mara wa takararsa baya.
Galadima ya bayyana hakan ne a wata hira da yayi da gidan Talabijin na Trust TV, inda ya kara da cewa NNPP za ta samu nasara a zaben da ke tafe.
- An Ciro Wata Mata Da Rai Daga Baraguzai Bayan Shafe Awa 52 A Turkiyya
- Jami’in DSS Na Bogi Da Wasu Sun Shiga Hannu A Osun
Ya ce, “Za mu kayar da Atiku a karamar hukumar Jada ta Jihar Adamawa.
“Atiku yana amfani da malaman Addini wajen rokon Kwankwaso ya ajiye takararsa, Atiku ya yi amfani da tsofaffin shugabannin kasa da manyan mutane wajen rokon Kwankwaso, Atiku ya yi amfani da sarakunan gargajiya, ya kashe biliyoyin Naira wajen lallashinsu su je su yi magana da Kwankwaso don ya goya masa baya.
“Mun ’yan Arewa ne. Kwankwaso dan Kano ne ni kuma dan Gashua ne. Kauyena da ke iyakar Arewa kusan kilomita 50 ne, don haka na fi su kusanci da Arewa kuma ni babba ne.
“Kwanan nan (Atiku) ya aika wasu fitattun malaman Addinin Musulunci guda uku gidan Kwankwaso domin su roke shi,”in ji Galadima.
A baya-bayan nan dai Atiku ya ce yana ganawa da tsagin Kwankwaso da Peter Obi don ganin daya daga cikinsu ya mara masa baya, amma kowanensu ya musanta kalaman na Atiku.
