An gudanar da bikin samar da lambar yabo ga aikin ilmantar da ’ya’ya mata na UNESCO na shekarar 2026 a birnin Paris na Faransa jiya Juma’a. farfesa Peng Liyuan, uwar gidan shugaban kasar Sin Xi Jinping, kuma wakiliyar musamman ta UNESCO kan ingiza aikin ilmantar da ’ya’ya mata, ta aika da jawabi ta faifan bidiyo zuwa bikin, don taya murna.  A jawabinta farfesa Peng Liyuan ta nuna cewa, Sin ta dade tana mai da hankali sosai kan ba da ilmi ga ’ya’ya mata, kuma tana hadin gwiwa da UNESCO da sauran bangarorin da abin ya shafa tare da samun ci gaba a zo a gani, wanda ya amfani mata da dama a kasashe da yawa.  A shekarun baya-bayan nan, Sin ta yi amfani da fasahar AI don karfafa karfin ba da ingantaccen ilmi, wanda hakan ya taimaka sosai wajen ingiza daidaito tsakanin jinsi a fannin ba da ilimi da inganta rayuwar mata gaba daya, kuma ta more dabarunta ga kasashe masu tasowa.  A cewarta, ana dora nauyi sosai a kan aikin ba da ilmi ga ’yan mata da mata a cikin dogon lokaci. A matsayinta na wakiliyar musamman ta UNESCO kan ingiza ilmantar da ’yan mata da mata, Peng ta yi kira ga al’ummar duniya da su hada hannu wajen karfafa koyar da sana’o’i da horar da mata, da karfafa karfin horar da mata a bangaren fasaha ta zamani, ta yadda za su ci gajiyar hakan, da samar musu makoma mai haske.  Peng Liyuan ta kara da cewa, tana fatan hadin gwiwa da kowane bangare wajen ingiza samun kasaitaccen ci gaba kan aikin ilmantar da ’ya’ya mata, da ba da gudummawa wajen taimakawa mata wajen samun makoma mai haske. (Amina Xu) 

Mataimakin firaministan kasar Sin, He Lifeng ya gana da kwamishinan kungiyar Tarayyar Turai mai kula da harkokin ciniki tattalin arziki da tsaro Maros Sefcovic a jiya Juma’a a Beijing, babban birnin kasar Sin, inda suka yi musayar ra’ayi kan karfafa alakar tattalin arziki da cinikayya a tsakaninsu.  A jawabin da ya gabatar, He ya ce a ko da yaushe kasar Sin na ba da muhimmanci mai karfi kan bunkasa alakar tattalin arziki da cinikayya tsakaninta da kungiyar Tarayyar Turai, kuma a shirye take, ta yi aiki da EU domin aiwatar da muhimman batutuwan da shugabanin bangarorin biyu suka cimma matsaya a kai.  A nasa bangaren, Sefcovic ya ce kasar Sin babbar abokiyar huldar kungiyar Tarayyar Turai ce a harkokin tattalin arziki da ciniki, yana mai cewa EU a shirye take ta ci gaba da karfafa alakar cinikayya da zuba jari, tare da karfafa sadarwa domin hada hannu wajen bunkasa hadin gwiwa a tsakaninsu.  Sin da kungiyar EU sun amince su ci gaba da kyautata alakar cinikayya da tattalin arzikin tsakaninsu, domin daidaita tsarin yadda ya kamata, tare da sanya watan Maris din shekarar 2027 domin sake ganawa da juna, karkashin tsarin tuntuba kan tattalin arziki da ciniki, kamar yadda sanarwar da bangarorin biyu suka fitar a Jumma’a.  Wata sanarwa da ma’aikatar kasuwanci ta kasar Sin ta wallafa, ta ce ministan kasuwanci na kasar Wang Wentao da kwamishinan harkokin kasuwanci, tattalin arziki da tsaro na EU Maros Sefcovic, su ne suka jagoranci ganawar da aka yi kan alakar ciniki da zuba jari tsakanin Sin da EU, wanda ya gudana a ranakun Alhamis da Jumma’a a birnin Beijing.   Ma’aikatar ta kara da cewa, bangarorin biyu sun yi tattaunawa mai ma’ana, tare da amincewa kan wasu muhimman batutuwa, da kuma cimma matsaya kan wasu batutuwa 16 da suka shafi ciniki da zuba jari, daidaita tsarin fitar da kayayyaki, hakkokin mallakar fasaha da kuma sauye-sauye a Hukumar Cinikayya ta Duniya (WTO). (Suleiman Suleiman ) 

Shugaban tawagar kasar Sin, wanda har ila yau shi ne shugaban sashin takaita yaduwar makamai na ma’aikatar harkokin wajen kasar...

Gwamnatin kasar Kenya ta karbi tallafin kudi daga kasar Sin, jimillar dalar Amurka miliyan 2 domin kara kaimi wajen yaki da cutar Ebola da kuma rage radadin fari da take fuskanta.  Jakadiyar kasar Sin a Kenya Guo Haiyan da babban sakataren asusun baitilmali na kasar Kenya Chris Kiptoo da babbar sakatariyar ma’aikatar kula da lafiyar al’umma Mary Muthoni sun halarci bikin mika kudin da ya gudana a jiya Alhamis a ma’aikatar kudi ta Kenya dake Nairobi, babban birnin kasar, inda bangarorin biyu suka sanya hannu.  Gwamnatin kasar Sin ta bayar da tsabar kudi dalar Amurka miliyan 1 kamar yadda gwamnatin Kenya ta nema, domin karfafa shirye-shiryen dakile yaduwar cutar Ebola a kasar bayan samun rahoton bullar ta.  Ragowar dala miliyan 1 kuma gwamnatin kasar za ta yi amfani da su domin daukar matakan dakile tasirin fari a kasar.  Kiptoo ya yabawa kasar Sin bisa yadda ta amsa rokonsu a kan lokaci da kuma bayar da tallafin kudin, domin kara musu kaimi wajen dakile yaduwar cutar Ebola da magance illar fari.  A ranar Talata ne Kenya ta sanar da rahoton bullar cutar, bayan wani ‘dan kasar ya dawo gida bayan shafe shekaru bakwai yana zaune a Jamhiriyyar Demokradiyyar Congo, inda ya rasu sakamakon kamuwa da cutar a wani asibiti da ke birnin Nairobi. (Mai fassara: Suleiman Suleiman)  )

Kafafen yada labarai na duniya, ciki har da Reuters, sun mai da hankali sosai kan lokacin hutun bikin ranar kafuwar jamhuriyar jama’ar kasar Sin da aka kammala kwanan nan. “Duk duniya ta san cewa Sinawa suna hutu” ya shahara sosai a yanar gizo. A lokacin hutu na kwanaki bakwai, yawan zirga-zirgar fasinjoji da aka yi jigilarsu a sassan yankuna daban daban na Sin ya kai biliyan 2.142, kana matsakaicin yawan fasinjojin a kowace rana ya kai miliyan 306, wanda ya karu da kashi 0.6 cikin dari bisa makamancin lokacin bara.  “Makon Zinare” lokaci ne da al’umma suka kashe kudi wajen sayan kayayykin bukata, wanda hakan ya baiwa kasar Sin karin damar samun kudaden shiga. Shirin raya kasa na shekaru biyar-biyar karo na 15 ya fadada bukatar cikin gida a matsayin ginshiki mai muhimmanci, yana mai da hankali sosai kan inganta kashe kudi. Daga ranar 1 zuwa ranar 6 ga watan Oktoba, zirga-zirgar masu sayayya da yawan kudaden shiga a cibiyoyin kasuwanci 78 da ma’aikatar kasuwanci ta sa ido a kansu sun karu da kashi 2.5% da kashi 4.7% bi da bi bisa makamancin lokaci na bara.  Hutun ya kuma nuna jajircewar Sin na bude kofa ga duniya. Masu yawon bude ido na Sin sun yi tafiya zuwa birane sama da 2000 a duk duniya, wanda hakan ya haifar da karuwar kudaden shiga ga harkokin sufurin jiragen sama, masaukai, cin abinci, da kuma harkokin kasuwanci na kasashen waje. A sa’i daya kuma, adadin masu yawon bude ido da suka shigo Sin a lokacin bikin tsakiyar kaka da kuma na ranar kafuwar jamhuriyar jama’ar kasar Sin ya samu karuwa sosai, inda yawancin masu yawon bude ido na kasashen waje suka bayyana cewa tafiye-tafiyensu zuwa Sin abin ban mamaki ne da ba za a manta da shi ba.  Yayin da ake aiwatar da shirin raya kasa na shekaru biyar-biyar karo na 15, karfin sayayya na Sinawa zai kara habaka, wanda hakan zai kara zurfafa huldar Sin da sauran kasashen duniya. (Safiyah Ma) 

Babban bankin kasar Sin ya bayyana matsayinsa kan manufar musanyar kudin kasar wato RMB jiya Alhamis 8 ga watan nan.  Takardar bayani da ya fitar ta yi nuni da cewa, kasar Sin na aiwatar da manufar musanyar kudi bisa tushen la’akari da bukatun kasuwa kuma ta hanyar da ta dace, ta yadda kasuwa za ta taka muhimmiyar rawa wajen kayyade darajar musanyar kudin kasar. Babban bankin kasar ba zai kayyade darajar musanyar kudi ba, kana ba zai yi shisshigi cikin makomar darajar musanyar kudin ba na dogon lokaci, maimakon haka, aikinsa shi ne a kiyaye darajar musanyar kudin yadda ya kamata.  Har wa yau, takardar bayanin ta ce, kasar Sin za ta aiwatar da tsare-tsaren shirin raya kasa na shekaru biyar-biyar karo na 15, da kawo sauye-sauyen salon bunkasa tattalin arziki, da habaka bukatun cikin gida, da fadada bude kofa ga kasashen waje, da zurfafa hadin-gwiwa tare da sassan kasa da kasa a harkokin kudade, da kara shiga cikin aikin inganta tsarin shugabancin duniya ta fuskar kudade, a wani kokari na tabbatar da kwanciyar hankalin tattalin arziki da kudi a duk fadin duniya. (Murtala Zhang) 

Ministan harkokin wajen kasar Sin Wang Yi, ya gana da tawagar shugabannin siyasa daga kasashen tsibiran tekun Pacific, karkashin jagorancin mataimakin firaministan Tonga, Viliami Uasike Latu, a birnin Beijing yau Jumma’a.  Wang ya bayyana cewa, bisa jagorancin hadin gwiwa na dukkan shugabannin kasashen da abin ya shafa, cikakkiyar alakar hadin gwiwa bisa manyan tsare-tsare a tsakanin Sin da kasashen tsibiran tekun Pacific ta kara zama babba wacce take gudana ba tare da tangarda ba.  Wang ya bayyana cewa, kasar Sin a shirye take ta yi aiki tare da kasashen tsibiran tekun Pacific domin ba wa juna cikakken goyon baya wajen bin hanyoyin samun ci gaba da suka dace da yanayin kowace kasa kuma irin wadanda al'ummominsu suka zaba da kansu bisa cin gashin kai, da karfafa musaya da hadin gwiwa tsakanin jam'iyyun siyasa, da kuma hada hannu wajen gina al'umma mai kyakkyawar makoma ta bai-daya dake da kusanci sosai da juna a tsakanin kasar Sin da kasashen tsibiran tekun Pacific.  A nasa bangare, Latu da sauran membobin tawagar sun gode wa kasar Sin saboda gagarumin taimakon da ta bayar a shekaru da dama ga ci gaban tattalin arziki da zamantakewa na kasashen tsibiran tekun Pacific.  Sun kuma ce kasashen tsibiran tekun Pacific za su kafe kai-da-fata wajen bin manufar kasar Sin daya tilo a duniya kuma a shirye suke su karfafa mu'amala da jam'iyyar JKS. (Abdulrazaq Yahuza Jere) 

An ruwaito cewa jami'an ma'aikatar shari'a ta Amurka sun bayyana cewa Amurka ta kwace wasu shafukan intanet guda bakwai da ake zargin suna da alaka da wasu Sinawa masu kutsen shafin intanet, wadanda suka yi kokarin keta hurumin tsare-tsaren na’urorin ababen more rayuwa a Amurka da kuma sauran wasu kasashe.  A matsayin martani ga wannan, mai magana da yawun ma'aikatar harkokin wajen kasar Sin, Mao Ning, ta bayyana cewa kasar Sin na matukar adawa da ayyukan kutsen shafukan intanet kuma tana fatattakar su bisa tanadin doka. Kazalika, kasar Sin na matukar adawa da yada bayanai marasa tushe balle makama da kuma tayar da hayaniya domin cimma manufofin siyasa. Kasar Sin tana kira ga bangaren Amurka da ya daina nuna fuska biyu da kuma amfani da yaudarar siyasa, kana ya yi aiki tare da kasar Sin ta hanyar tattaunawa da tuntubar juna bisa tushen daidaito, domin tunkarar barazanar tsaron shafukan intanet cikin hadin gwiwa tare da gina dangantaka mai cike da zaman lafiya, da kwanciyar hankali, da mutunta juna dangane da batutuwan shafin intanet.  A wani labarin kuma, a martanin da ta mayar kan kokarin da masu ra’ayin rikau na kasar Japan ke ci gaba da yi na jirkita tarihin yakin duniya na biyu ta hanyar shigar da gurbatattun bayanai cikin manyan samfuran manhajojin AI, Mao Ning ta bayyana cewa amfani da sabbin fasahohi don lalata hakikanin bayanan ya kasance wata sabuwar hanyar da masu ra’ayin rikau na Japan ke amfani da ita wajen gurbatawa da kuma kambama tarihin yakin Japan. Manufar hakan ita ce a cusa wata bahaguwar fahimta a tarihin yakin duniya na biyu, da kawar da adawar jama'a da sake afkawa yaki bayan samun zaman lafiya da kuma hanzarta sake tara karfin soji a Japan. (Abdulrazaq Yahuza Jere) 

Shin zai yiwu wani mutum bayan ya kamu da cuta, sai ya sa sauran mutane shan magani a madadinsa? Ta wannan hanya zai iya samun waraka kuwa? Sanin kowa ne, hakan ba zai yiwu ba. Duk da haka, abun da ya yi kama da wannan misali ya kan faru a duniyarmu.  A kwanan nan, wasu kasashe sun ce wai an kaskantar da darajar musanyar kudin kasar Sin wato RMB da gangan, har ma sun ce za su tilasta kasar Sin don ta daga darajar kudin. Nufinsu shi ne, da farko, suna tsammanin cewa kasar Sin ta rage darajar kudinta don neman samun fifiko wajen fitar da kayayyakinta zuwa ketare. Kuma na biyu shi ne, idan an sa darajar kudin Sin ta karu, to, za su samu damar daidaita matsalar da suke fuskanta ta karancin fitar da kayayyaki zuwa ketare.  Dangane da zancensu, babban bankin kasar Sin, wato bankin jama'ar kasar Sin ya gabatar da wata takarda a jiya Alhamis, wadda ta bayyana ra'ayin gwamnatin kasar dangane da darajar musanyar kudin RMB. A cikin takardar, an ce, da farko, kasar Sin na aiwatar da manufar musanyar kudi bisa tushen la'akari da bukatun kasuwa, kana ta daina daukar matakin kayyade darajar kudinta na yau da kullum tun daga shekarar 2017, wato ba ta juya akalar darajar musanyar kudin RMB.  Sa'an nan na biyu shi ne, babu wata alakar kai tsaye tsakanin darajar musanyar kudi da yanayin ciniki, ma'ana, ko da yake kasar Sin ta fi fitar da kayayyaki bisa kwatantawa da darajar kayayyakin da ta shigar da su daga ketare, amma hakan ba ya nufin cewa ya kamata a daga darajar musanyar kudin RMB.  Sa'an nan na 3 shi ne, kasar Sin ba ta bukatar neman samun fifiko a fannin ciniki ta hanyar rage darajar kudinta, kuma ba ta da niyyar yin haka. A akasin haka, kasar tana kawo sauye-sauyen salonta na raya tattalin arziki, da habaka bukatun cikin gida, da fadada bude kofa ga kasashen waje, a kokarin tabbatar da daidaituwar yanayin tattalin arzikin duniya.  Hakika ra'ayin gwamnatin kasar Sin ya yi daidai da na dimbin masana ilimin tattalin arziki na kasashe daban daban. Misali, tsohuwar babbar masaniyar ilimin tattalin arziki ta asusun lamunin duiya (IMF), Gita Gopinath, da tsohon babban masanin ilimin tattalin arziki na IMF, Pierre-Olivier Gourinchas, da farfesa ta jami'ar koyon ilimin kasuwanci ta London dake kasar Birtaniya, Helene Rey, sun yi hadin gwiwa wajen rubuta wata makala don a wallafa ta a mujallar the Economist ta kasar Birtaniya, inda suka bayyana cewa, bai kamata a ce musabbabin matsalar da cinikin duniya ke fuskanta yanzu shi ne raguwar darajar musanyar kudin Sin ba.  A cewarsu, darajar musanyar kudin RMB ta kasance a wani matsayi mai karko a shekarun nan, kana raguwar darajar kudin RMB da aka samu a kwanakin nan, ba domin “juya akalar darajar kudi” ne ake samunta ba, a’a, dalilin da ya sa hakan ya faru shi ne domin kasar Sin ba ta fama da hauhawar farashin kayayyaki mai tsanani kamar abokanta na ciniki. Ban da haka, a cewar wadannan masanan ilimin tattalin arziki uku, ko da an daga darajar kudin Sin sosai ma ba zai haifar da manyan sauye-sauye ga yanayin cinikin duniya ba, saboda karuwar darajar kudin Sin zai sa bukatar kasar kan kayayyakin sauran kasashe ta ragu.  Sai dai idan mun yi bincike kan ainihin dalilin da ya sa kasashen Turai da kasar Amurka fuskantar mawuyacin hali a fannin fitar da kayayyakinsu, shi ne domin yadda suke dogaro kan bangaren hada-hadar kudi fiye da kima, da lalacewar bangaren masana’antunsu.  Matakan da ya kamata su dauka sun hada da daidaita yanayin da suke ciki na karancin ajiyar kudi, da kashe kudi fiye da kima, da yawan cin bashi don biyan bukatar gudanar da ayyukan gwamnati, gami da inganta tsare-tsarensu a fannin masana’antu, maimakon dora wa kasar Sin laifi a-kai-a-kai. (Bello Wang) 

A baya bayan nan ma’aikatar kimiyya da fasaha ta Sin ta sanar da aniyar gaggauta mayar da kasar Sin jagora, kuma mai samar da sabbin kirkire-kirkire, sabanin mai bayar da gudunmawa a fannonin kimiyya da fasaha, bayan da tuni Sin din ya zamo cikin muhimman kasashe dake da saurin samun karsashin ci gaban kirkire-kirkire.  Alal hakika, wannan sako ne a bayyane wanda ke tabbatar da aniyar kasar ta zama mai cikakken ikon dogaro da kai, da karfin cin gajiyar fannonin kimiyya da fasaha, kuma kasa wadda ta rungumi wannan manufa cikin ginshikanta na wanzar da zamanantar da kai.  Ana iya ganin kwazon kasar Sin a wannan fanni cikin tanadin shirin raya kasa na shekaru biyar-biyar karo na 15 da ake aiwatarwa tsakanin shekarar nan ta 2026 zuwa 2030, inda kasar ke kokarin amfani da ci gaban kimiyya da fasaha, wajen kyankyashe sabbin karfin samar da hajoji masu nagarta da ingiza kere-kere.  Har ila yau, ana iya ganin yunkurin cimma wannan manufa, idan aka kalli adadin kasafin da kasar Sin ta shigar a fannin bincike da samar da ci gaba ko R&D, wanda darajarsa a shekarar 2025 da ta gabata ya haura kudin kasar yuan tirliyan 3.92, kwatankwacin dalar Amurka biliyan 584.5, adadin da ya kai kaso 2.8 bisa dari na jimillar GDPn kasar.   A halin da ake ciki yanzu, kasar Sin ce kan gaba wajen yawan manyan dalibai masana kimiyya da fasaha, da fannin aikin injiniya, da lissafi, baya ga babbar kasuwar sayayya ta dijital dake ingiza kirkire-kirkire da kasar ke da ita. Kazalika, Sin na kan gaba wajen cin gajiyar fasahar intanet ta 5G, da fannin lissafin manyan na’urori masu kwakwalwa na “quantum”, da fasahar jirage marasa matuka.   Masharhanta na ganin kasar Sin mai karin fasahohin kirkire-kirkire, za ta haifar da wani yanayi ga duniya baki daya, na cin gajiyar fasahohi daban daban. Wato dai ci gaban Sin a fannonin kimiyya da fasaha, zai bude karin kofofi da damarmaki ga dukkanin bil’adama, tare da a saita akalar duniya zuwa turbar bunkasar tattalin arziki mai game dukkanin sassa a gomman shekaru dake tafe.(Saminu Alhassan)