A baya bayan nan ma’aikatar kimiyya da fasaha ta Sin ta sanar da aniyar gaggauta mayar da kasar Sin jagora, kuma mai samar da sabbin kirkire-kirkire, sabanin mai bayar da gudunmawa a fannonin kimiyya da fasaha, bayan da tuni Sin din ya zamo cikin muhimman kasashe dake da saurin samun karsashin ci gaban kirkire-kirkire.  Alal hakika, wannan sako ne a bayyane wanda ke tabbatar da aniyar kasar ta zama mai cikakken ikon dogaro da kai, da karfin cin gajiyar fannonin kimiyya da fasaha, kuma kasa wadda ta rungumi wannan manufa cikin ginshikanta na wanzar da zamanantar da kai.  Ana iya ganin kwazon kasar Sin a wannan fanni cikin tanadin shirin raya kasa na shekaru biyar-biyar karo na 15 da ake aiwatarwa tsakanin shekarar nan ta 2026 zuwa 2030, inda kasar ke kokarin amfani da ci gaban kimiyya da fasaha, wajen kyankyashe sabbin karfin samar da hajoji masu nagarta da ingiza kere-kere.  Har ila yau, ana iya ganin yunkurin cimma wannan manufa, idan aka kalli adadin kasafin da kasar Sin ta shigar a fannin bincike da samar da ci gaba ko R&D, wanda darajarsa a shekarar 2025 da ta gabata ya haura kudin kasar yuan tirliyan 3.92, kwatankwacin dalar Amurka biliyan 584.5, adadin da ya kai kaso 2.8 bisa dari na jimillar GDPn kasar.   A halin da ake ciki yanzu, kasar Sin ce kan gaba wajen yawan manyan dalibai masana kimiyya da fasaha, da fannin aikin injiniya, da lissafi, baya ga babbar kasuwar sayayya ta dijital dake ingiza kirkire-kirkire da kasar ke da ita. Kazalika, Sin na kan gaba wajen cin gajiyar fasahar intanet ta 5G, da fannin lissafin manyan na’urori masu kwakwalwa na “quantum”, da fasahar jirage marasa matuka.   Masharhanta na ganin kasar Sin mai karin fasahohin kirkire-kirkire, za ta haifar da wani yanayi ga duniya baki daya, na cin gajiyar fasahohi daban daban. Wato dai ci gaban Sin a fannonin kimiyya da fasaha, zai bude karin kofofi da damarmaki ga dukkanin bil’adama, tare da a saita akalar duniya zuwa turbar bunkasar tattalin arziki mai game dukkanin sassa a gomman shekaru dake tafe.(Saminu Alhassan) 

Mataimakin firaministan kasar Sin He Lifeng, wanda kuma ke jagorantar tattaunawar tattalin arziki da hada-hadar kudi tsakanin Sin da Birtaniya, ya zanta ta kafar bidiyo da babban ministan kudin Birtaniya John Healey da yammacin yau Alhamis.  Yayin zantawarsu, manyan jami’an sun zurfafa musayar ra’ayoyi dangane da matakan da aka tattauna a baya, na bunkasa hadin gwiwar tattalin arziki da hada-hadar kudi, da sauran batutuwan da suke jan hankulansu.  A bangarensa, He Lifeng ya ce kamata ya yi sassan biyu su hada hannu wajen aiwatar da muhimman kudurorin da shugabannin kasashen biyu suka cimma matsaya a kansu, su kuma ci gaba da karfafa musaya, da hadin gwiwa a fannonin tattalin arziki da hada-hadar cinikayya, da martaba manyan moriyar juna, da cimma sakamako mai amfanar da juna da moriyar bai daya, kana su ingiza daidaito, da ci gaba mai gamsarwa a fannin bunkasa alakar tattalin arziki ta Sin da Birtaniya.  A nasa bangare kuwa, mista Healey cewa ya yi Birtaniya, a shirya take ta karfafa tattaunawar tattalin arziki da hada-hadar cinikayya tare da Sin, ta yadda za a kai ga ingiza ci gaban alakar sassan biyu.  (Saminu Alhassan) 

Mai magana da yawun ma’aikatar harkokin wajen kasar Sin Mao Ning, ta ce gabatar da sunan Dr. Song Li da kasar Sin ta yi, a matsayin ‘yar takarar mukamin babban daraktan hukumar kiwon lafiya ta duniya WHO, ya shaida matukar goyon bayan kasar ga tsarin cudanyar mabambantan sassa da ita kanta hukumar ta WHO.  Mao Ning, ta bayyana hakan ne a Alhamis din nan, yayin taron manema labarai da ya gudana, lokacin da take amsa tambaya mai nasaba da hakan, inda ta ce a gabar da tsarin cudanyar mabambantan sassa ke fuskantar tarin kalubale, kuma ake bukatar gudanar da matakai masu yawa a fannin ingiza nagartar kiwon lafiya a duniya, rawar da babban daraktan WHO zai taka, musamman a bangaren sarrafa akalar hukumar, karkashin sabbin sauye-sauye da yanayi daban daban, za ta haifar da daidaito da ci gaba mai dorewa.  Jami’ar ta ce yadda Sin ta gabatar da sunan Dr. Song, ya shaida aniyarta ta yin aiki tare da dukkanin sassa wajen hada karfi, don ingiza gina al’ummar duniya mai ingantaccen tsarin kiwon lafiya na bai daya, kana ya nuna matukar goyon bayan Sin ga tsarin cudanyar mabambantan sassa da ita kanta hukumar ta WHO.     (Saminu Alhassan)  

Mai magana da yawun ma’aikatar harkokin wajen kasar Sin Mao Ning, ta ce shugaban majalisar ministocin kasar Togo Faure Essozimna Gnassingbé, zai gudanar da ziyarar aiki a kasar Sin daga gobe Juma’a 9 zuwa 16 ga watan nan na Oktoba.   Mao Ning, wadda ta bayyana hakan a Alhamis din nan, yayin taron manema labarai da ya gudana, ta ce yayin ziyarar mista Gnassingbé zai gana, da tattaunawa da shugaban kasar Sin Xi Jinping, da firaministan kasar Li Qiang, da shugaban zaunannen kwamitin majalisar wakilan jama’ar kasar Sin Zhao Leji.   Ana sa ran mista Gnassingbé, zai kuma ziyarci lardunan Shaanxi, da Fujian da Guangdong. Mao ta ce Sin ta yi imanin cewa, wannan ziyara za ta daga matsayin alakar Sin da Togo, tare da samar da gudunmawa ga gina al’umma mai makomar bai daya ta Sin da Afirka a dukkanin fannoni a sabon zamani.   Da take amsa tambayar da aka yi mata, dangane da ziyarar da mai ba da taimako ga shugaban kasar Rasha kuma shugaban hukumar lura da harkokin teku Nikolai Patrushev ke gudanarwa a Sin a halin yanzu, Mao ta ce Sin na fatan amfani da wannan ziyara a matsayin damar aiki tare da bangaren Rasha, wajen zurfafa tuntuba bisa matsayin koli, da ingiza hadin gwiwa na hakika, da kara shigar da sabon karsashin bunkasa alakar dake tsakanin Sin da Rasha a sabon zamani.  Kaza lika, Mao Ning ta sanar da cewa, mashawarci a fannin diflomasiyya ga shugaban kasar Faransa Emmanuel Bonne, zai kawo ziyara kasar Sin daga gobe Juma’a 9 ga watan nan zuwa ranar 13 ga watan. Kuma ministan harkokin wajen kasar Sin Wang Yi, zai gudanar da sabon zagayen tattaunawa bisa matsayin koli, na Sin da Faransa tare da mista Bonne.   Ana sa ran sassan biyu, za su yi tattaunawa bisa matsayin koli dangane da zurfafa hadin gwiwar Sin da Faransa a fannoni daban daban, tare da gudanar da musayar ra’ayoyi mai zurfi game da batutuwan kasa da kasa, da na shiyyoyi da suke jan hankulansu.  (Saminu Alhassan) 

Hukumar al’adu da yawon bude ido ta birnin Beijing ta kasar Sin ta ba da labari jiya Laraba cewa, a hutun bikin murnar zagayowar ranar kafuwar jamhuriyar jama’ar kasar Sin, Beijing ta karbi ziyarce-ziyarce miliyan 23.45 daga masu yawon bude ido, kuma jimillar kudaden da aka kashe kan yawon bude ido ta kai yuan biliyan 29.49. Daga cikinsu, an karbi ziyarce-ziyarce dubu 126 daga masu yawon bude ido da suka shigo kasar Sin daga kasashen waje, kana yawan kudaden da suka kashe ya kai yuan biliyan 1.37.  Alkaluman sun nuna cewa, wuraren yawon bude ido da yankuna guda goma da suka fi karbar masu yawon bude ido a Beijing a lokacin hutun su ne, titin hada-hadar sayayya na Wangfujing, gabar kogin Liangma na kasa da kasa, lambun shan iska na Olympic, titin hada-hadar sayayya na Xidan, yankin filin Tian’anmen, titin Qianmen, lambun shan iska na Tiantan, wurin yawon shakatawa na Shichahai, titin Nanluoguxiang, da wurin tarihi na fadar shakatawar sarakuna wato Summer Palace. (Amina Xu) 

Mai magana da yawun ma’aikatar harkokin wajen kasar Sin Guo Jiakun, ya ce kasar Sin na bayyana matukar adawa da...

A jiya Talata 6 ga watan nan, wato ranar kusa da ta karshe a kwanaki bakwai na hutun bikin murnar...

Wakilin dindindin na kasar Sin a MDD Fu Cong, ya yi jawabi a budadden taro na kwamitin sulhun MDD a jiya Talata, inda ya bukaci al’ummun duniya da su ci gaba da taimakawa kasashen Afirka wajen tabbatar da zaman lafiya da ci gaba.  Yayin taron mai taken “Hadin gwiwar MDD da AU”, Fu Cong ya ce nahiyar Afirka na zama wani muhimmin bangare mai haifar da tasiri ga duniya. Dangantakar hadin gwiwa tsakanin MDD da AU, jami’in ya ce misali ne na hadin gwiwar bangarori da yawa, kuma ya taka muhimmiyar rawa wajen inganta zaman lafiya, da zaman karko da kuma ci gaban Afirka.   Fu Cong ya kara da cewa, kasashen Afirka na bukatar goyon baya ba tare da tsagaitawa ba daga MDD, da ma al’ummun duniya, domin su cimma burin “kawar da karar bindigogi”, da kuma nemo hanyar zamanantar da kasa da ta dace da yanayin da suke ciki.   Ya kuma gabatar da shawarwari uku game da hakan. Na farko, kamata ya yi a warware muhimman matsaloli ta hanyar siyasa, don hada kai wajen inganta zaman lafiya da zaman karko a Afirka. Na biyu, a kara zuba jari a ci gaban Afirka, don taimakawa nahiyar wajen samun wadata da ci gaba. Na uku, a gyara da inganta jagorancin harkokin duniya, da nuna goyon baya ga Afirka don ta dogara da kanta da karfafa kanta.  Kazalika Fu Cong ya ce, a bana ake cika shekaru 70 da fara kafa huldar diflomasiyya a hukumance tsakanin Sin da kasashen Afirka. Kuma Sin na son ci gaba da yin aiki tare da bangarori daban daban, ta hanyar ayyuka na hakika, don nuna goyon baya ga MDD da AU wajen karfafa hadin gwiwarsu, da taimakawa Afirka ta sami zaman lafiya da ci gaba yadda ya kamata. (Bilkisu Xin) 

Yankin musamman na Hong Kong na kasar Sin, ya sake zama wuri mafi ’yancin hada-hadar tattalin arziki a duniya, kamar...

An fara watsa shirin bincike mai sassa uku mai taken “Yadda aka kawar da laifukan zamba ta yanar gizo da wayar salula a arewacin Myanmar”, ta tashar CCTV-1 ta babban rukunin gidajen rediyo da talibijin na Sin wato CMG a takaice, tun daga ranar 5 zuwa 7 ga watan nan na Oktoba, da karfe 18:00 na yammacin kowace rana.   An dauka da tsara wannan shirin ne bisa hadin gwiwar ma'aikatar tsaron jama'ar kasar da CMG, wanda ya nuna cikakken yadda hukumomin tsaron jama'a na Sin tare da hukumomi masu alaka suka gudanar da aikin musamman na yaki da laifuffukan da suka shafi Sin a arewacin Myanmar, da kuma tarihin gwagwarmaya mai wahala, da nasarori a fannin kawar da kungiyoyin aikata laifuka irin su "manyan iyalai hudu" na arewacin Myanmar gaba daya.  Shekarar da muke ciki, ita ce shekara ta farko ta aiwatar da shirin shekaru biyar-biyar na bunkasa tattalin arziki da zamantakewar kasar Sin na 15, “shirin shekaru biyar-biyar da ya shafi bunkasa tsaron jama’a” ya riga ya sanya yaki da magance laifukan zamba ta yanar gizo da waya, cikin manyan ayyukan da aka fi mayar da hankali a kansu. Gwamnatin Sin ta kuma kaddamar da kawancen kasa da kasa mai kunshe da kasashe 46 don yaki da zamba ta yanar gizo da wayar salula. (Bilkisu Xin)