Gwamnan babban bankin al’ummar kasar Sin Pan Gongsheng, ya ce za a kaddamar da matakin samar da tallafin tsabar kudade da nufin taimakawa cibiyoyin hada-hada da ba bankuna ba, ta yadda za su samu ikon biyan basussuka.  Pan Gongsheng, ya bayyana hakan ne a Litinin din nan, yayin bikin kaddamar da dandalin tattauna batutuwan hada-hadar kudi na shekarar nan ta 2026 a birnin Beijing, dandalin da ya samar da zarfin musayar ra’ayoyi tsakanin kusoshin manyan hukumomin dake lura da hada-hadar kudade na kasar Sin, dangane da manufofin da suke baiwa fifiko.  Pan, ya kuma yi karin haske game da tanade-tanade masu fadi dake kunshe cikin matakan inganta hada-hadar kudade, ciki har da kyautata kaidin farashin basussuka, da kyautata tsarin gudanar da cinikayyar ketare tsakanin hukumomi masu ruwa da tsaki, ta amfani da kudin Sin wato yuan a kasuwar musayar kudade ta kasar.  A daya bangaren kuma, shugaban babbar hukumar lura da hada-hadar kudade ta kasar Sin Ding Xiangqun, ya ce Sin za ta ci gaba da ingiza bude kofa a fannin hada-hadar kudade, da yiwa karin cibiyoyin hada-hadar kudi na ketare maraba, da kuma karbar karin kudaden jari na dogon zango.  Dandalin tattauna batutuwan hada-hadar kudi na shekarar nan ta 2026, na gudana ne tun daga yau Litinin 19 zuwa 22 ga watan nan na Oktoba a birnin Beijing, ya kuma hallara manyan baki sama da 400 daga kasashe da yankunan duniya sama da 40. (Saminu Alhassan) 

Da safiyar yau Litinin 19 ga watan Oktoba, firaministan Sin Li Qiang ya gana da shugaban Tajikistan Emomali Rahmon da kuma takwaransa na kasar Kokhir Rasulzoda a Dushanbe, babban birnin kasar.  A yayin da yake ganawa da shugaba Emomali Rahmon, Li Qiang ya ce, a halin yanzu, Sin da Tajikistan na ingiza gina kyakkyawar makomar al’ummarsu ta bai daya. Kuma Sin na fatan fadada cinikayyar shige da fice tsakanin kasashen biyu, da karfafa hadin gwiwa a fannin ababen more rayuwa, da hakar ma’adanai ba tare da gurbata muhali ba, da kara tuntubar juna, da fadada hadin gwiwa a sabbin masana’antu kamar tattalin arzikin yanar gizo da fasahar AI da sauransu, domin karfafa ci gaban tattalin arzikinsu.  Ya kara da cewa, ya kamata bangarorin biyu su zurfafa hadin gwiwa wajen aiwatar da doka a fannin tsaro, da karfafa musayar bayanai, da yaki da “’yan ta’adda da masu tsatsauran ra’ayin addini da ’yan aware”, da kiyaye zaman lafiya da kwanciyar hankali mai dorewa a yankin. Bugu da kari, Li Qiang ya ce, Sin na fatan karfafa mu’ammala da hadin gwiwa da Tajikistan karkashin tsarin gudanar da harkoki tsakanin mabambantan bangarori kamar su MDD da tsarin Sin da Asiya ta tsakiya, ta yadda za a aiwatar da manyan shawarwarin duniya guda hudu da shugaban kasar Sin Xi Jinping ya gabatar, da kuma gina kyakkyawar makomar al’ummar bil’adama ta bai daya.  A nasa bangaren, shugaba Rahmon ya ce, Tajikistan na fatan kara zurfafa hadin gwiwa da Sin a fannin cinikayya da masana’antu, da noma, da makamashi da ma’adinai da zirga-zirga, da fasahar AI, da ingiza musayar al’adu. Haka kuma, Tajikistan tana goyon bayan manyan shawarwarin duniya guda hudu da shugaba Xi ya gabatar, kuma tana fatan karfafa hadin gwiwa da Sin a MDD da kungiyar hadin gwiwa ta Shanghai SCO, da tsarin Sin da Asiya ta tsakiya da sauransu, domin ingiza dangantakar hadin gwiwar abokantaka bisa manyan tsare-tsare a dukkan fannoni ta sabon zamani tsakanin Tajikistan da Sin, da gina kyakkyawar makomar al’ummar kasashen biyu ta bai daya.   Kazalika, a wannan rana kuwa, Li Qiang ya gana da takwaransa na kasar Tajikistan Kokhir Rasulzoda. A ganawar tasu Li ya ce, Sin a shirye take domin yin aiki da Tajikistan wajen bunkasa shirin hadin gwiwar ayyukan ci gaba mai inganci a tsakaninsu.  Ya kuma kara da cewa, kasar Sin, na da niyyar daidaita dabarunta na ci gaba da Tajikistan, da karfafa hadin gwiwa ta fuskar cinikayya da zuba jari, da kyautata alaka, da ma’adanai marasa illa ga muhalli, da makamashi mai tsafta, da fasahar kirkirarriyar basira ta AI, da dai sauransu. Yayin da yake la'akari da halin da kasashe ke ci gaba da fuskanta na samun sauye-sauye masu sarkakiya, Li ya ce kasancewar su mambobi masu muhimmanci a kasashe masu tasowa, Sin da Tajikistan za su ci gaba da hada kai da kulla alakar kut da kut, domin kare muradun bai daya na kasashen biyu, da kare adalci da gaskiya a mu'amalar kasa da kasa. (Amina Xu, Suleiman Suleiman) 

A matsayin aikin rufe “bikin nuna fasahar bidiyoyi na kasa da kasa”, an gudanar da bikin dare domin nuna fasahar...

Yau ranar 19 ga watan Oktoba, hukumar kididdiga ta kasar Sin ta fitar da bayanai da suka nuna cewa, a watanni tara na farkon bana, tattalin arzikin kasar Sin ya jure matsin lamba, inda ya ci gaba da tafiya cikin kwanciyar hankali ba tare da tangarda ba. Bisa kididdiga ta mataki na farko, jimillar kudin da aka samu wato GDPn kasar ya karu da kashi 4.6% idan an kwatanta da makamancin lokacin a shekarar da ta gabata.  A hakikai dai, tattalin arzikin kasar a watanni tara na farkon bana, ya ci gaba da tafiya cikin matsin lamba, yana mai bayyana alamar ci gaba bisa karfin kirkire-kirkire da ingantaccen tsari. Ban da wannan kuma, ana samun ci gaba cikin sauri wajen samar da kayayyaki, yayin da cinikayyar waje ta samu kyakkyawan ci gaba, kana guraben aikin yi da farashin kayayyaki sun kasance cikin kyakkywan yanayi gaba daya, kuma ana tabbatar da ganin jama’a sun samu ingantacciyar rayuwa, kuma juriya da kuzarin ci gaban tattalin arziki na kara bayyanawa.   Sai dai a wani bangare daban, ya kamata a lura cewa yanayin kasa da kasa yana da sarkakiya, kuma yana canzawa, matsalar karancin bukatu a cikin gida ma har yanzu tana bayyana sosai, kuma ana bukatar karfafa ingancin tushen tattalin arzikin dake tafiya cikin kwanciyar hankali. A mataki na gaba kuma, dole ne a ci gaba da bin jagorancin shugaban kasar Xi Jinping na gina tsarin gurguzu mai sigar musamman ta Sin na sabon zamani, don nace ga bin ka’idar ci gaba cikin kwanciyar hankali, da aiwatar da sabon ra’ayin samun ci gaba yadda ya kamata a duk fannoni, da kuma hanzarta gina sabon tsarin ci gaba. Kazalika da ci gaba da zurfafa gyare-gyare a cikin gida da bude kofa ga ketare, da karfafa karfin jagoranci na kirkire-kirkire da mai da hankali kan amfani da karfin manufofin tattalin arziki bisa manyan tsare-tsare. Haka kuma da kara karfin fadada bukatun cikin gida da inganta karfin samar da kayayyaki, kana da tabbatar da inganta rayuwar jama’a, ta yadda za a ingiza samun bunkasar tattalin arziki mai inganci.  Bugu da kari, a bana jimillar hatsin lokacin zafi wato yawan shinkafar da aka girbi yanzu ya kai ton miliyan 179.04, wadda ta karu da ton dubu 780 idan an kwatanta da shekarar da ta gabata, wato ya karu da kashi 0.4%. Ban da wannan kuma, noman hatsin kaka yana tafiya cikin yanayi mai kyau, kuma ana sa ran a duk shekara, za a sake samun nasarar girbi mai armashi. (Amina Xu) 

Wani mai magana da yawun ofishin jakadancin kasar Sin dake Japan, ya yi matukar Allah wadai da matakan baya bayan...

A yau Lahadi ne firaministan kasar Sin Li Qiang, ya isa birnin Dushanbe domin fara ziyarar aiki a kasar Tajikistan, tare da halartar taro karo na 25 na majalisar shugabannin gwamnatocin kasashe membobin kungiyar hadin gwiwa ta Shanghai ko SCO a takaice.  Li Qiang, ya isa birnin Dushanbe ne bayan kammala ziyarar aiki a kasar Uzbekistan, inda ya zanta da firaministan kasar Abdulla Aripov a jiya Asabar. Yayin zantawar tasu, Li Qiang ya ce Sin a shirye take ta karfafa tsare-tsaren aiwatar da dabarun neman ci gaba tare da Uzbekistan, da zurfafa hadin gwiwa a fannonin makamashi, da albarkatu, da fasahar AI, da noman zamani da sauran sassa. (Saminu Alhassan) 

A yau Lahadi ne aka bude dandalin Liangzhu a birnin Hangzhou na lardin Zhejiang dake gabashin kasar Sin. Dandalin karo na hudu, zai mayar da hankali ne ga tattauna batun tarin kalubale, dake tattare da kare gado da hanyoyin zurfafa hadin gwiwar kasa da kasa.  A shekarar nan ta 2026 ne ake bikin cika shekaru 90 da gano baraguzan Liangzhu. Kuma dandalin na bana na da take "Hade zamanin baya da mai zuwa: Kare gado domin zamaninmu". Kazalika, dandalin ya hallara jami’ai, da masu aikin hako ababen tarihi da malamai daga sassa daban daban na duniya.  Yayin wata ganawa da manema labarai, Zhang Ling, jami’a a hukumar lura da gadon al’adu ta kasar Sin, ta ce ana sa ran kwararru, da masana za su tattauna game da batutuwa da dama, tun daga wadanda suka jibanci wayewar kai ta zamanin dauri, zuwa bincike game da aikin hako kayan tarihi a tsaffin biranen da suka gushe. A daya hannun kuma, za a baje kolin sabbin sakamakon bincike da ci gaba da aka samu a wannan fage.   A nata tsokacin kuwa, cikin jawabin bude dandalin da ta gabatar, ministar raya al’adu ta kasar Girka Lina Mendoni, cewa ta yi ya zama wajibi jama’a su matsa gaba daga dabarun gargajiya, su rungumi masu wanzuwa, kana su rike tsarin gudanarwa mai samar da kariyam game da dukkanin bangarori da nufin kare al’adu na gado yadda ya kamata.  A bangarensa kuwa, cikin wani sako ta kafar bidiyo da ya gabatar, mataimakin babban daraktan hukumar UNESCO ta MDD Nayef Al-Fayez, cewa ya yi tsarin gudanar da yawon bude ido mai dorewa, zai taimaka wajen kare al’adu na gado ta hanyar kara wayar da kayan jama’a game da muhimmancin gado domin zuri’u’in masu zuwa, da kyautata fahimtar al’adu, da karfafa yanayin rayuwar al’ummu masu nasaba da hakan".    (Saminu Alhassan) 

Da yammacin yau Lahadi ne aka bude gasar wasannin Asiya ajin masu bukata ta musamman karo na biyar a birnin Nagoya na kasar Japan. Kasar Sin ta aike da tawagar ‘yan wasan motsa jiki 312, wadanda za su fafata a rukunonin wasanni 335 a sassan gasar 17.  (Saminu Alhassan) 

Kwanan nan, Firaministar kasar Japan Sanae Takaichi, ta aike da hadaya zuwa haikalin Yasukuni, sannan ministan manufofin tattalin arziki da...

Jakadan kasar Sin kan harkokin kwance damarar makamai Li Chijiang, ya yi kira ga kasashen duniya su hada hannu wajen...