Farashin raguna, kayan abinci da sauran kayayyaki ya ƙaru sosai yayin da Musulmi ke shirye-shiryen bikin babbar sallah a faɗin Nijeriya.
Leadership Hausa ta zagaya wasu kasuwanni, inda ta tarara da yawan raguna, awaki da kaji da ake sayarwa, farashinsu ya yi tsada fiye da ƙarfin masu saye.
Ana sayar da raguna tsakanin Naira 300,000 zuwa Naira miliyan ɗaya gwargwadon girmansu.
Farashin kaji da kayan abinci ma ya ƙaru.
Kaza ‘yar wata uku yanzu tana kai wa tsakanin Naira 20,000 zuwa Naira 30,000, yayin da buhun shinkafa ya kai kusan Naira 80,000.
Alhaji Bulama na Ƙungiyar Masu Sayar da Raguna ya danganta tashin farashin da matsalar tsaro da kuma tsadar abincin dabbobi.
Ya ce hare-haren ’yan bindiga sun sa magidanta da dama da ke kiwon dabbobi a ƙauyuka barin gidajensu.
Wani mai sayar da dabbobi, Malam Musa Adamu, ya ce tsadar sufuri ma na daga cikin abubuwan da suka haddasa hauhawar farashin, domin yanzu ana kawo dabbobin daga wurare masu nisa.
Wani mutum da ya je kasuwa siyayya, Dakta Musa, ya ce duk da tsadar, zai sayi rago domin Sallah Babba.
Sai dai ya shawarci Musulmi da kada su ci bashi saboda sallah, su kashe abin da za su iya kawai.
