A Daren yau Talata manyan kungiyoyin kwallon kafa biyu Real Madrid da Bayern Munich zasu hadu a filin wasa na Santiago Bernabeau domin buga wasan farko na zagayen na kusa da na kusa da na karshe na gasar Zakarun Turai ta bana.
Masu sharhin wasanni na ganin wasan a matsayin wanda zai fi kowane wasa a wannan kakar wasan ta bana zafi, duba da cewar duka kungiyoyin biyu babu kanwar lasa a cikinsu fagen taka leda.
A wasanni 36 da kungiyoyin biyu suka buga a tsakaninsu kowa ya samu nasara sau 15 inda aka buga canjaras 6, amma sai dai Real Madrid ta fitar da Bayern Munich a matakin na kusa da na karshe na wannan gasar a shekarar 2023.
Real Madrid na fatan cigaba da nuna matsayinta a wannan gasar ta Zakarun Turai inda ta lashe kofin sau 15 a tarihi, yayinda Bayern Munich ke fatan ganin ta dauki fansar raunin da Madrid din tayi mata shekaru uku da suka gabata a wannan filin na Santiago.
