Ƙasar Birtaniya ta ƙi amincewa da aƙalla buƙatun biza miliyan 1.34 da ’yan Nijeriya suka gabatar tsakanin shekarar 2005 zuwa ƙarshen zangon farko na shekarar 2026, kamar yadda bayanan hukuma daga Ma’aikatar Cikin Gida ta Birtaniya suka nuna.
Binciken bayanan sakamakon buƙatun bizar shiga ƙasar na Ma’aikatar ya nuna cewa an ƙi amincewa da buƙatun biza 1,344,595 daga ’yan Nijeriya a cikin shekaru 21 da suka gabata, lamarin da ya sanya Nijeriya zama ƙasa ta biyu a duniya da aka fi ƙin amincewa da buƙatun bizar ’yan ƙasarta zuwa Birtaniya, bayan ƙasar India.
Alƙaluman da aka samo daga ƙididdigar shige da fice ta gwamnatin Birtaniya daga shekarar 2005 zuwa zangon farko na 2026 sun nuna cewa Nijeriya ta wakilci kashi 15.2 cikin ɗari na jimillar buƙatun biza miliyan 8.83 da aka ƙi amincewa da su a duniya a wannan lokaci.
Duk da yawan ƙin amincewar, ’yan Nijeriya sun samu bizar Birtaniya guda 2,723,558 a cikin wannan lokaci, wanda ya sanya Nijeriya ta kasance ƙasa ta uku a duniya da aka fi bai wa ’yan ƙasarta bizar Birtaniya, bayan India da China.
Bayanan sun kuma nuna cewa Nijeriya ita ce ƙasar Afirka da ta fi samun bizar shiga Birtaniya, inda ta zarce ƙasashen Afirka ta Kudu da Masar a yawan bizar da aka bayar wa ’yan ƙasarta.
