Yau Lahadi 19 ga watan Yulin shekarar 2026 za’a buga wasan karshe na gasar kofin Duniya a birnin New York na kasar Amurka, inda ake saran sama da yan kallo mutum 90,000 zasu kalli wasan a cikin babban filin wasar, kasashen Argentina da Spain ne zasu fafata a wasan domin sanin wanda zai lashe mafi daukakar wasa a kwallon kafa.
Akwai tarin abubuwa dangane da wannan kofi na gasar Duniya da mutane da yawa basu sani ba, Leadership Hausa ta zakulo maku wasu daga cikinsu kamar yadda zaku karanta:
Rukunin mutane uku kacal ne aka lamuncewa su taɓa kofin Duniya ba tare da sanya safar hannu ba, waɗannan mutane uku sune shugaban hukumar kwallon kafa ta FIFA, ‘yan wasan kasar da ta lashe kofin Duniya da kuma shugabannin kasashen Duniya.
Asalin nauyin kofin Duniya shine kilo 6.1, amma kuma kilo 5 duka Zinare ne ziryan ba tare da wani haɗi ba, kenan kilo 1.1 ne kacal a kofin Duniya wanda ba Zinare ba.
Abu na uku shine, an fara bayar da wannan kofin Duniya da ake bayarwa a halin yanzu a shekarar 1974, lokacin da aka daina bayar da tsohon kofin gasar mai suna Jules Rimet bayan an bayar da kofin ga kasar Brazil a lokacin da ta zama kasa ta farko da ta fara lashe gasar sau uku a wancan lokacin.
