Ra’ayin shugaban kasar Sin Xi Jinping kan dabarar kirkirarriyar basira ta AI mai mayar da hankali kan bukatun jama’a, dake jaddada bukatar AI ta kasance wadda za a amince da ita, da ke karkashin sarrafawar dan adam, kuma fasaha mai amfani da amfanar da kowa, ya samu goyon baya da jinjina daga kasa da kasa.
Katleho Moloi, farfesa a jami’ar Afrika ta Kudu ya bayyana cewa, cikin jawabin da ya gabatar yayin bikin bude taron duniya kan fasahar AI da taron manyan jami’ai kan inganta shugabancin AI, shugaba Xi ya gabatar da wani ra’ayi mai muhimmanci da ya shafi jagorantar harkokin rayawa da shugabancin AI.
Farfesa Moloi ya bayyanawa babban rukunin gidajen rediyo da talabijin na kasar Sin (CMG) cewa, “babban burin shi ne, ba ma bukatar wani tsarin da zai maye gurbin dan Adam, sai dai wanda zai kara inganta rayuwar dan Adam.”Shugaba Xi ya sanar a taron na ranar Juma’a cewa, kasar Sin za ta samar wa kasashe masu tasowa damarmaki 5,000 na shirye-shiryen horo da kara wa juna sani kan AI da ba kasashe 30 damar amfani da tsarinta na gargadin yanayi na MAZU mai amfani da fasahar AI, domin kare gidaje a fadin duniya.
Bugu da kari, Sin za ta samar da cibiyoyin hadin gwiwar ayyukan AI tare da kungiyoyin da suka hada da ta kasashen kudu maso gabashin Asiya da ta kasashen Larabawa da Tarayyar Afrika da ta al’ummar Latin Amurka da Caribbean da kungiyar hadin kai ta Shanghai da kuma kungiyar BRICS.Blade Nzimande, ministan kula da harkokin kimiyya da kirkire-kirkire na Afrika ta kudu, ya yaba wa manufar ra’ayin Sin na gina al’umma mai makoma ta bai daya ga dukkan bil adama da goyon bayanta ga dukkan kasashe su shiga a dama da su cikin harkokin rayawa da shugabancin fasahar AI.
A cewarsa, kasashen Afrika ba su da abubuwan da ake bukata na raya fasahar AI, kuma Sin tana samar da yanayi mai dacewa na ba kasashe masu tasowa damar cin gajiyar ci gaban fasahar AI . (Fa’iza Mustapha)
