Jam’iyyar adawa ta ADC ta bayyana cewa za ta tallafa wa samar da ɗanyen mai a cikin gida domin rage farashin man fetur idan ta lashe zaɓen shugaban ƙasa na 2027.
Jam’iyyar ta ce ’yan Nijeriya sun afka cikin talauci sosai, don haka, bai dace a ƙyale su su ɗauki dukkan nauyin tsadar man fetur da tsarin kasuwa ke haifarwa ba.
Sakataren yaɗa labaran jam’iyyar na ƙasa, Bolaji Abdullahi, ya bayyana cewa gwamnatin Shugaba Bola Tinubu ta cire tallafin man fetur ba tare da yin isasshen shiri don kare ’yan Nijeriya daga matsin tattalin arzikin da hakan zai haifar ba.
Da yake magana a shirin ‘Politics Today’ na gidan talabijin na Channels a ranar Litinin, Abdullahi ya ce ADC, ƙarƙashin ɗan takararta na shugaban ƙasa, Atiku Abubakar, za ta ba da fifiko wajen rage tsadar rayuwa maimakon barin ’yan ƙasa su kaɗai su fuskanci illolin tsadar kayayyaki da tsarin kasuwa ke haifarwa ba.
