An kaddamar da sabon yankin gwaji na ciniki cikin ’yanci na jihar Mogoliya ta gida da ke arewacin kasar Sin, da safiyar yau Asabar 11 ga wata, al’amarin da ya sa adadin irin wadannan yankunan gwaji na ciniki cikin ‘yanci ya karu zuwa 23 a duk fadin kasar Sin.
Kafuwar yankin gwaji na ciniki cikin ’yanci na jihar Mongoliya ta gida, sabon mataki ne da kasar Sin ta dauka a bangaren yin gyare-gyare a gida da bude kofa ga kasashen waje. Tun kafuwar irin wannan yanki a birnin Shanghai da ke gabashin kasar Sin a watan Satumbar shekara ta 2013, kawo yanzu, kasar ta kafa yankunan gwaji na ciniki cikin ’yanci a sassan kasar daban-daban. To amma ko mene ne fa’idar kafa sabon yankin gwaji na ciniki cikin ’yanci na Sin ga dukkanin duniya?
A matsayin yankunan da ke saukaka matakan cinikayya da zuba jari, yankunan gwaji na ciniki cikin ’yanci suna samar wa sassan kasa da kasa dimbin damarmakin ciniki da zuba jari, ta yadda duk duniya za ta mori ci gaban kasar Sin. Har wa yau, yankin gwaji na ciniki cikin ’yanci da aka kafa a jihar Mongoliya ta gida, zai zurfafa hadin gwiwar tattalin arziki da cinikayya da kasashe makwabta, da kara hada hanyoyi tsakanin Sin da Mongoliya da Rasha har da kasashen Turai, al’amarin da ya samar wa duniya wata muhimmiyar hanyar cinikayya mai inganci.
Abu mafi muhimmanci a nan shi ne, yayin da wasu kasashe ke yunkurin bin akidun nuna bangaranci, da bada kariyar ciniki, Sin a nata bangare tana himmatuwa wajen kyautata ayyukan kafa yankunan ciniki cikin ’yanci, da fadada bude kofa ga kasashen waje, al’amarin da ya zamo misali ga sassan kasa da kasa.
Har ila yau, hakan ya shaida cewa, duk da yadda wasu kasashe ke yunkurin adawa da ra’ayin dunkulewar duniya baki daya, kara samar da ’yanci da sauki a harkokin ciniki da zuba jari, shi ne babban fata da bukatun duniya. (Murtala Zhang)
