Manyan ‘yan kasuwar man fetur sun dage cewa Matatar Man Fetur ta Dangote, duk da rage farashi mai yawa da ƙaruwar yawan fitar da man fetur a cikin gida, ba za ta iya wadatar da ‘yan Nijeriya man fetur ba, suna gargaɗin cewa dogaro da tushe ɗaya tuni ya riga ya haifar da matsaloli a natakin haƙo man na ƙasa.
Babban Sakataren Ƙungiyar Manyan ‘Yan Kasuwa Masu Shigo da Man Fetur a Nijeriya (MEMAN), Mista Clement Isong, ya faɗi haka yayin da yake amsa tambayoyi kan tasirin rage farashin man fetur na kwanan nan daga kimanin N828 zuwa N699 kan kowace lita, wanda ya haifar da farashin famfo zuwa kusan N739 kowace lita a tashoshin mai da yawa na MRS.
- Fintiri Ya Ƙaddamar Da Tallafin Naira Biliyan 1 Ga Mutane 5,357 Da Ambaliyar Ruwa Ta Shafa A Adamawa
- Xi Jinping Ya Yi Muhimmin Bayani A Kan Ayyukan Kamfanoni Mallakar Gwamnati
Isong ya ce duk mambobin MEMAN a halin yanzu suna siyan man fetur daga matatar man fetur ta Dangote amma ya jaddada cewa ƙalubalen ƙaruwar yawan masu siyan mai a matatar, ƙalubalen dakon man, da buƙatar samar da man a kan lokaci, hakan babban ƙalubale ne ga ‘yan Nijeriya in ta zama ita kaɗai ce madogara wurin samar da man fetur a Nijeriya.
Isong ya ce Hukumar Kula da Matatun Man Fetur ta Nijeriya ta shirya sosai don samar da wadataccen man fetur a lokacin bukukuwan Kirismati da na ƙarshen shekara ta hanyar ba da lasisi don shigo da man fetur daga ƙasashen waje.
“Yawancin mambobinmu, duk suna sayan mai daga matatar Dangote. Kawai idan kowa a Nijeriya yana saya daga gare shi, to lokaci zuwa lokaci ba zai iya biyan buƙatunsu ba – don ‘yan kasuwa ba sa jira, suna buƙatar kayansu a lokacin da suke so, da kuma yadda suke so – to dole ne su nemi wasu hanyoyi in aiki ya yi wa Dangote yawa
“Don haka wasu daga cikin mambobinmu suna shigo da mai, wasu kuma suna saya daga gare su -waɗanda ke shigo da man,” in ji shi.
Ya bayyana cewa, buƙatun ‘yan kasuwa kan samar da mai ya bambanta sosai, yana mai lura da cewa dogaro da matatar guda ɗaya da ke aiki a wuri ɗaya a al’adance yana haifar da cikas.
