Gidauniyar Dangote ta sanar da ware hannun jari na Naira miliyan 366 domin tallafa wa ’yan gudun hijira da waɗanda suka koma muhallansu a Jihar Borno, tare da shirin bayar da tallafin karatu ga ’yan mata dubu shida.
An bayyana tallafin ne a ƙarshen taron tattaunawa kan hanyoyin magance matsalar ’yan gudun hijira mai ɗorewa, wanda aka gudanar na tsawon kwanaki biyu a Legas.
Mai ba Gwamnan Borno shawara kan yaɗa labarai, Dauda Iliya, ya ce kamfanoni tara sun rattaba hannu kan yarjejeniyoyin saka hannun jari domin taimakawa wajen farfaɗo da tattalin arzikin jihar.
Gidauniyar Dangote ta kuma yi alƙawarin ɗaukar nauyin karatun ’yan mata 4,000 cikin shekaru shida masu zuwa, domin inganta damar samun ilimi a jihar da rikicin Boko Haram ya shafa.
A wani mataki na jawo masu zuba jari, Gwamnatin Borno ta yi alƙawarin ware filayen masana’antu cikin makonni biyu, yayin da za a ware filayen gidaje cikin sa’o’i 24. Ta kuma yi alƙawarin rangwamen haraji da samar da yanayin kasuwanci mai kyau.
Haka kuma, kamfanin Airtel ya samu amincewar kafa hasumiyoyin sadarwa domin faɗaɗa ayyukan sadarwa a jihar.
Gwamnatin Borno, tare da haɗin gwiwar GIZ da Dyna-vest, za ta kafa wani kwamiti da zai sa ido kan aiwatar da alƙawuran masu zuba jari da kuma bibiyar ci gaban ayyukan farfaɗo da jihar.
