Hukumar Yaƙi da Cin Hanci da Rashawa ta ƙasa (EFCC) ta kafa wata tawaga ta musamman domin binciken wasu ’yan siyasa da tsofaffin jami’an gwamnati da aka ambata a hukuncin kotun sasantawa ta Ƙungiyar Kasuwanci ta Duniya (ICC) kan rikicin aikin samar da wutar lantarki na Mambilla da ke Jihar Taraba.
Majiyoyin Premium Times sun ce shugaban EFCC, Olanipekun Olukoyede, ne ke kula da aikin tawagar.
Matakin ya biyo bayan hukuncin da kotun sasantawa ta ICC da ke Paris ta yanke ranar Alhamis, inda ta yi watsi da wasu buƙatun kamfanin Sunrise Power and Transmission Company Ltd kan Gwamnatin Nijeriya.
Kamfanin, ƙarƙashin Leno Adesanya, ya nemi a biya shi dala miliyan 680 da kuma wasu kuɗaɗen da suka shafi wata taƙaddama da ta kai sama da dala biliyan 2.7. Kotun ta kuma umarci Sunrise da Adesanya su mayar wa Nijeriya kuɗin shari’a da suka kai dala miliyan 11.8.
Daga cikin mutanen da aka ambata a cikin hukuncin akwai tsohon Mataimakin Shugaban Ƙasa, Atiku Abubakar; da tsohon Ministan Shari’a kuma Babban Lauyan Gwamnatin Tarayya, Abubakar Malami; da tsohon Ministan Wutar Lantarki da Karafa, Olu Agunloye; da tsohon Mai Ba Shugaban Ƙasa Shawara kan Tsaro, Sambo Dasuki; da ɗansa Abubakar Dasuki; da Abdullahi Yola da Dere Awosika.
Hukumar EFCC na son bincikar wasu mu’amaloli da aka ambata a cikin shari’ar da kuma dangantakarsu da aikin Mambilla.
Game da Atiku, hukuncin ya ambaci biyan dala 500,000 da Leno Adesanya ya yi wa Jennifer Douglas Abubakar, tsohuwar matar Atiku, a shekarar 2003.
Adesanya ya bayyana cewa kuɗin na da alaƙa da wata mu’amalar canjin kuɗi da aka yi wa Atiku, amma kotun ta ce ba a gabatar da isassun takardun da za su tabbatar da wannan bayani ba. Sai dai kotun ba ta ce Atiku ya karɓi cin hanci ko ya yi amfani da matsayinsa wajen bai wa Sunrise kwangilar Mambilla ba.
A nasa martanin, Atiku ya musanta cewa kotun ta tuhume shi ko ta same shi da laifi, yana mai cewa ba shi ne ya bayar da kwangilar aikin ba.
Mai magana da yawunsa, Phrank Shaibu, ya kuma ƙalubalanci masu sukar Atiku da su nuna inda hukuncin ya ce ya karɓi cin hanci ko ya shiga wata makarƙashiyar cin hanci. Kakakin EFCC, Dele Oyewale, ya tabbatar da cewa yana sane da batun kafa tawagar, amma ya ce ba a yi masa cikakken bayani kan aikin tawagar ba.
