Hukumar EFCC ta sake buɗe binciken zarge-zargen laifukan kuɗi da ake dangantawa da tsohon Mataimakin Shugaban Ƙasa, Atiku Abubakar, bayan wani tsohon ɗan majalisar wakilai ya shigar da ƙara yana neman a gurfanar da shi a gaban kotu.
Hukumar Yaƙi da Yi wa Tattalin Arzikin Ƙasa Ta’annati (EFCC) ta sake buɗe binciken zarge-zargen da ake yi wa tsohon Mataimakin Shugaban Ƙasa, Atiku Abubakar, bayan wani tsohon ɗan majalisar wakilai, Hon. Ehiozuwa Johnson Agbonayinma, ya shigar da ƙara yana neman a ɗauki matakin shari’a kan lamarin.
Ƙarar ta buƙaci hukumar da ta sake duba wani bincike da ya samo asali tun shekarar 2006, lokacin da Mallam Nuhu Ribadu ke shugabantar EFCC, tare da yin nazari kan wani rahoto da wani ƙaramin kwamiti na Majalisar Dattawan Amurka ya fitar daga baya.
Da yake magana kan matakin, Agbonayinma ya ce EFCC ta tabbatar masa da cewa ta karɓi ƙarar da ya shigar a ranar 27 ga Agusta, 2026, wadda aka miƙa wa hukumar a ranar 1 ga Satumba, 2026.
An shigar da ƙarar ne ta hannun lauyansa, Chief Hannibal Egbe Uwaifo, SAN, inda aka buƙaci hukumar ta sake buɗe binciken da ta gudanar a baya tare da ɗaukar matakan da suka dace kan zarge-zargen.
Tsohon ɗan majalisar ya kuma je hedikwatar EFCC da ke Jabi, Abuja, inda ya tabbatar da ƙarar tasa tare da amsa tambayoyin masu binciken hukumar.
Agbonayinma ya ce bai kamata a bar batun ya ci gaba da zama ba tare da an warware shi ba.
Ya ce, “Ina so in gode wa ’yan Nijeriya, EFCC da kuma waɗanda ke yi mini addu’a a wannan fafutuka. Dokokin ƙasa na kowa ne, masu kuɗi da talakawa. Bayan EFCC ta yi kyakkyawan aiki, bai kamata a ɓoye shi a ƙarƙashin tebur ba.”
A cikin ƙarar, Agbonayinma ya buƙaci EFCC ta sake duba rahoton da ta fitar a watan Satumba na shekarar 2006 kan Atiku, da kuma rahoton da ƙaramin kwamitin binciken harkokin kuɗi na Majalisar Dattawan Amurka ya fitar a ranar 4 ga Fabrairu, 2010.
Ya yi iƙirarin cewa waɗannan rahotanni ya kamata su zama ginshiƙin sake ɗaukar mataki kan batun.
Ƙarar ta kuma yi zargin cewa a baya EFCC ta nuna cewa Atiku zai iya fuskantar tuhuma bayan ya bar muƙaminsa na mataimakin shugaban ƙasa, lokacin da kariyar shari’ar da kundin tsarin mulki ya tanadar masa saboda muƙaminsa za ta ƙare.
Sai dai, a cewar Agbonayinma, ba a gurfanar da shi a gaban kotu ba bayan barin muƙamin.
Tsohon ɗan majalisar ya bayyana abin da ya kira rashin ɗaukar mataki a matsayin sakaci wajen gudanar da aiki, yana mai cewa bin diddigin lamarin zai nuna ƙudirin hukumar na tabbatar da cewa manyan mutane masu tasiri a siyasa ma suna fuskantar bincike idan ana zargin sun aikata laifi.
Ya kuma bayyana cewa ya shigar da ƙara ga Shugaban Amurka, Donald Trump, kan zarge-zargen.
A halin da ake ciki, mai magana da yawun EFCC, Dele Oyewale, bai mayar da martani kan saƙonnin da aka aika masa domin neman ƙarin bayani game da halin da binciken yake ciki ba har zuwa lokacin kammala haɗa wannan rahoto.
